बर’ रावनि फुंखा

गिबियावनो नोंथांमोनखौ जोंनि Bodo Tutor वेबसाइटआव बरायना लाग्रोनाय जाबाय। दिनै जों सावरायगोन बर’ रावनि फुंखानि बागै। बे आरटिकलनि जोहै जों मिथिगोन बर’ राव माखौ बुंनाय जायो? बर’ रावनि गुदि राव फोलेरा मा? बर’ राव फोलेरनि जोनोमा बहा जादोंमोन? बर’ राव फोलेरनिफ्राय ओंखारनाय दालाइ दासा एबा Sister Language फोरा मा मा?

बर’ राव माखौ बुंङो मिथिना लानि फै

बर’ हारिनि मानसिफोरा जाय रोखोमसे रिंसारनि सिनफोरजों दानाय सोदोबथि गोनां सोदोबफोरखौ बाथ्रायाव बाहायनानै गोसोनि साननायखौ फोरमायथियो बेखौनो बर’ राव बुंनाय जायो।

बर’ रावनि गुदि राव फोलेरा मा बेनि बागै मिथिना लानि फै

बर’ रावनि गुदि राव फोलेरा जादों ” तिब्बत -बार्मो “।बे रावफोलेरनि जोनोमखौ ब्रह्म आरो चिन हादोरनि गेजेराव थानाय हादराव जादोंमोन होननानै सानसुमैफोरा बुंङो।बे रावफोलेरनि हान्जासेया तिब्बतजों फैनानै नेपाल-भुटान फारसे हाबफैयो।लेपसा, लेकटि ,वाल्टि रावफोरा बे फोलेरनिनो।गुबुन मोनसे हानजाया आसाम फारसे फैयो।आसामाव थानाय बे रावफोलेरनि मोनसे गुबै रावआ बर’।आसामाव तिब्बत बार्मो रावनि बिसाना बांसिन।

बर’ राव फोलेरनिफ्राय ओंखारनाय दालाइ दासा एबा Sister Language फोरा जाबाय

• मिसिं
• राभा
• देउरि
• गार’
• लालुं
• चुटिया
• मटक
• मरान
• हाजं
• कच

आसामनि बर’ रावनि गुदि रावखौ जों कासारनि डिमासा रावखौनो बुंनो हागौ ।बे रावनिनो मोनसे दालाइया टिपारा एबा त्रिपुरा राव।बे रावखौ जों आसामनि गुबुन-गुबुन जायगानि रायज्लायग्रा एबा खुगानि रावै गुबैयै गोदोनि ग’वालपारा ,कामरुप, दरं, नगाव जिलायाव खोनायो।पश्मिम बंग’नि जलपाइ गुरियावबो बर’ रावनि दालाइ दं।

बर’ रावखौ दाब दाब जायगायाव मा मा मुं दोनदों बेफोरखौ मिथिना लानि फै

बर’ रावखौ दाब दाब जायगायाव गुबुन गुबुन मुं दोनदों।जेरै -नेपालाव मेसि राव,पश्मिमबंगआव मेसि एबा बड’ राव,आसामाव बर’,सा कासार हिल्सआव दिमासा ,त्रिपुरायाव क’क बर’क, नागालेण्डआव कसारि राव आरो रंपुर आरो मैमनसिंआव बड’।जि.ज. ग्रियासनआ गावनि सार्टआव दिन्थिनाय बादिब्ला चिन तिब्बेतान एबा तिब्बेत बार्मा फोलेरनि तिब्बेद’ बार्मा दालाइनि असमिया हान्जानि सिंङाव थानाय बड’ नागा बिफान Bodo Sub-Section आव दं होननानै बर’ रावखौ दिन्थिनाय जादों।रबार्ट सेफारआ रावनि फोलेरखौ राननानै फोरमायदोंदि चिन तिब्बेत फोलेरनि Baric Section आव थानाय Barish Section नि सोनाबनि दालाइयाव बर’ रावआ गोग्लैयो।

ग्रियासननि ,”The Linguistic survey of India ” नि सार्टखौ गाहायाव होनाय जाबाय –

सानसे समाव बर’ रावआ दुलाराय आसामावनो साग्लोबदोंमोन।मंग’लियान सुबुं न’खरनि बर’ हारिनि मानसिफोरा बेसेबा बोसोर सिगांनिफ्रायनो साग्लोबसार रायजो खुंनायाव बर’ रावखौनो अफिसियेल राव महरै बाहायदोंमोन होनना बुंङो।रेभारेण्ड सिडनि एण्डेलनि बादिब्ला It is indeed not at all unlikely that the people known to us as Kacharies and to themselves as Bodo or Boro were in earlier days the dominant race in Assam.

गेजेर ससेयाव बर’ रावा नोरजिया जालांबायमोन।बर’ आनो बर’ रावखौ रायज्लायनो लाजिबायमोन।नाथाय सानैसो आगोमा बर’ राव अनसायग्राफोरनि जिउनां नाजानायावसो बर’ रावा थांखां फिनदोंमोन।बे बिथिंआव जों रुपनाथ ब्रह्म,सतिश चन्द्र बसुमतारि , मदाराम ब्रह्म ,प्रमद चन्द्र ब्रह्म बाइदिनि मुंखौ सिबिनायजों गोसोखांथावो। बिथांमोना बिबार, अलंबार, बैराथि बाइदि लाइसिफोर दिहुननानै बर’ रावखौ फोथांनो नाजादोंमोन। उनावहाय इं 1952 मायथाइनि 16 नबेम्बराव बर’ साहित्य सभाखौ दानायनि उनाव बे गौथुमा बर’ राव गेवलांसारनायनि थाखाय माखासे  हाबाफारि लायो।

बर’ साहित्य सभानि नाजानायाव इं 1963 मायथाइयाव फरायसालियाव बर’ बिजोंखौ थिसननाय जानायनिफ्राय बर’ रावनि बिथाया गोख्रों जानो हमो।

इं 1988 मायथाइनि उनाव बर’ राव आरो थुनलाइया दालाम दावगानो हमो।

बर’ रावआ गुवाहाटि मुलुक सोलोंसालिनि सिंङाव इं 1994 मायथाइयाव डिप्लमा ,इं 1996 मायथाइयाव एम.ए इं  1999 मायथाइयाव इलिकतिभ आयदा हिसाबै थिसन जायो।दासिम NEHU (Shillong) ,Dibrugarh University ,Assam University (Silchar) आवबो बर’ रावखौ MIL हिसाबै गनायथि होनानै फोरोंनायनि राहा खालामनाय जादों।

इं 1984 मायथाइयाव बर’ रावा आसाम सरकारजों आसामनि लोगो हादाबारि एबा अफिसियेल रावनि मान मोनदोंमोन आरो बर’ रावखौ भारत हादरनि संबिजिरनि 8 थि सिदिउलआव सोसननाय जाबाय।

बर’ रावनि फुंखानि माखासे सोंनाय फिननाय:

1)बड’ सोदोबखौ गिबियाव सोर बाहायजेनदोंमोन?

क) Rev. Sidney Endle

ख) B.H. Hodgson

ग) Sir Edward Gait

घ) Dr. S.K. Chatterjee

फिननाय: ख

2)बर’ रावा गाहाइनि बबे राव हान्जानि सिंङाव –

क) आर्ज्य राव हान्जा

ख) चिन तिब्बेतान राव हान्जा

ग) अस्ट्रिक राव हान्जा

घ) द्राभिर राव हान्जा

फिननाय: ख

3) माब्ला बर’ रावखौ एम.ए. थाखोआव थिसनदोंमोन?

क) 1996 मायथाइ

ख) 1997 मायथाइ

ग) 1999 मायथाइ

घ) 1998 मायथाइ

फिननाय: क

4) बर’ रावखौ नेपालाव मा मुं होदों?

क) बड’ 

ख) मेसि

ख) दिमासा

घ) क’क बरक

फिननाय: ख

5)गाहाइनि बबेयो बर’ राव फोलेरनिफ्राय ओंखारनाय नंङा –

क) मिसिं

ख) राभा

ग) देउरि

घ) संस्क्रिट 

फिननाय: घ

6) बर’ रावनि गिबि रावखान्थिनि मुंङा?

क) गोनां रावखान्थि

ख) बर’ रावखान्थि

ग) गोदान रावखान्थि

घ) An outline of Kachari Grammar

फिननाय: घ

7) मिसनारिफोरा बर’ थुनलाइखौ मा हांखोजों लिरदोंमोन?

क) रमान हांखो

ख) असमिया हांखो

ग) देबनारि हांखो

घ) तामिल हांखो

फिननाय: क

8) रमान हांखोनि हांगामाया माब्ला जादोंमोन?

क) 1970 मायथाइयाव

ख) 1971 मायथाइयाव

ग) 1972 मायथाइयाव

घ) 1974 मायथाइयाव

फिननाय: घ

9)ग्रियासननि “The Linguistic Survey of India” नि बादिब्ला बर’ रावा दं –

क) बड’ नागा रावनि सिंङाव

ख) मरान रावनि सिंङाव

ग) लालुं रावनि सिंङाव

घ) मिसिं रावनि सिंङाव

फिननाय: क

10) ड’ सुनिति कुमार सेटारजिनि मथै बांला सोदोबा-

क) असमिया रावनिफ्राय सोमजिनाय

ख) बर’ रावनिफ्राय सोमजिनाय

ग) कार्बि रावनिफ्राय सोमजिनाय

घ) नेपालि रावनिफ्राय सोमजिनाय

फिननाय: ख

11) गाहाइनि सोर सासे सुबुंङा बर’ रावखान्थि लिराखैमोन?

क) रेभारेण्ड सिडनि एण्डेल

ख) रेभारेण्ड एइस हलभुरस्रद

ग) मनरन्जन लाहारि

घ) भबेन नार्जा

फिननाय: ख

12)गुवाहाटि मुलुक सोलोंसालियाव बर’ रावखौ एम आइ एल हिसाबै गनायथि होदोंमोन?

क) 1987 मायथाइयाव

ख) 1977 मायथाइयाव

ग) 1997 मायथाइयाव

घ) 1967 मायथाइयाव

फिननाय: घ

13) बर’ रावखौ गुदि फरायसालियाव बिजों महरै बेसेबां मायथाइयाव थिसननाय जादोंमोन?

क) 1958

ख) 1959

ग) 1962

घ) 1963

फिननाय: घ

14) माब्लानिफ्राय बर’खौ इलेकटिभ आयदायाव थिसनखो?

क) 1999 मायथाइयाव

ख) 1998 मायथाइयाव

ग) 1997 मायथाइयाव

घ) 1996 मायथाइयाव

फिननाय: क

15) Dr. Banikanta Kakati आ सिमान लादोंदि असमिया रावआव बर’ सोदोबा हाबना दं –

क) 3000 निख्रुइबो बारा

ख) 4000 निख्रुइबो बारा

ग) 6000 निख्रुइबो बारा

घ) 5000 निख्रुइबो बारा

फिननाय: ख