Chapter 2: Bodo MIL Class 12 Solutions| Bodo Medium| आलारि दामब्रा

Chapter 2: Bodo MIL Class 12 Solutions| Bodo Medium| आलारि दामब्रा: Bodo Tutor is your trusted partner for AHSEC Class 12 Bodo MIL solutions in the Bodo medium. In this article, we provide comprehensive solutions for Chapter 2, आलारि दामब्रा, designed to align perfectly with the latest AHSEC syllabus. Our detailed and well-organized answers ensure students gain a clear understanding of the concepts, helping them excel in their exams. Whether you’re searching for AHSEC Class 12 Bodo MIL Chapter 2 Solutions, HS Class 12 Bodo MIL Question-Answers, or resources for Bodo Medium studies, this guide caters to all your needs.

Explore top-quality solutions for Bodo MIL Chapter 2, expertly crafted to support your learning and preparation. Trust Bodo Tutor for the best Class 12 Bodo MIL resources and make your exam preparation more effective!

Chapter 2: Bodo MIL Class 12 Solutions| Bodo Medium| आलारि दामब्रा

फारानि सोंथि

1. एहेम बोराइया माबादि जायगाखौ सिदोमा हासारगोनां होनना फामु खुंनो लादोंमोन ?

फिनः एहेम बोराया गामिनि सेंग्राफोरजों हादान जानो थांनायाव बाथा रेवा सुबासे आरो औवागोनां जायगा दाबसे मोननानै बे जायगाखौनो हासारगोनां होनना फामु खुंनो लादोंमोन।

2. बर’फोरनि हाग्रा एवस्रांनाय आबाद मावनाय खान्थिया बे सल’आव माबादियै बेरखांदों ?

फिन: बरफोरनियाव हादान सिफायनाय हुदाया गोदोनिफ्रायनो दं। बर’फोरा गामि खाथि खालायाव आबाद मावनो हा-हु गैयाब्ला गुबुन जायगायाव हासार गोनां हां नागिरना आबाद मावनो थाखाय आबादथिलि सायखयो। आबादथिलि सायखनायनि उनाव बेयावनो हादान सिफायनो गामिनि सेंग्राफोरा ज’ जानानै फामु जानो थाहैयो। फामु जानो थांनाय समाव लोगोआव मायरं खिन्दाबो होननानै लांफानाय जाखायो। बेयावनो जायै लोंयै आबाद मावनो थाखाय सायखनाय हानि हाग्रा बंग्राखौ एवस्रां एवस्रिं खालामनानै सावनाय जायो। बेबादिनो आबाद मावनो थाखाय बर’फोरा हासारगोनां सायखनानै लायो आरो बेयावनो आबाद मावो।

आलारि दामब्रा खुगा सल’ आंबो एहेम बोराइ आरो दे बुरैनि गामिनि बार’ खुरै बार’जन सेंग्रा सिख्लाफोरा गामि खाथियाव आसु, फाथो मावनो जायगा गैयिलाय हा नागिरनो फामु जानो लिरनायाव सानसेखालि गामिनि सेंग्राफोरखौ लानानै जान्जियाव माइरं खिन्दासे बोननानै थाखो थाखो साथ थाखो  हाजो बारनानै दाबसे हखसारगोनां हायाव फामु जाहैनाय आरो आबाद मावनो हासार गोनां हा सायखनायनि गेजेरजों बर’फोरनि हाग्रा एवस्रांनाय आबाद मावनाय खान्थिया आलारि दामब्रा खुगा सल’आव बेरखांदों।

3. एहेम बोराइया गामिनि सेंग्रा-सिख्लाफोरखौ मानो गइ जानानै मुजुदैखौ दाबोराव मुजुसोमनो थिनदोंमोन ?

फिन: एहेम बैराइ आरो दे बुरैया सासेबो गथ’ गथाय गैयिलाय आनान गसाइनियाव सानफ्रोमबो गाबै गाबै बोर बियोमोन। सानसेखालि दे बुरैया सिथ्लायाव हांगार गोग्लैनाय नुनानै हासिबजों सिबस्रांनाय जायगायाव सोरगोनिफ्राइ गय थाइसे फाथै गांसे जलदब गोग्लैफैनायखौ नुनानै बुरैया बोराय फैबाय ज’ आरो खावनानै जालायसिगोन होननानै जलंगायाव सोनानै दोन्दोंमोन। सान जखायनैनि उनाव गावदां दां हौवासा गथ’ जोनोम जानायसै। गथखौ नुनानै एहेम बोराइ आरो दे बुरैया रंजाखांनाय सै। नाथाय बे गथ’खौ माबोरै मानसिफोरनि सिगाङाव खिन्थागोन? बेनिखाइनो, बोराय बुरै सानैया सानसे गामिनि बार’ खुरै बार’जोन सेंग्रा सिख्लाफोरखौ लेंहरनानै गइ फाथै जाहोनानै बयखौबो दाबोराव मुजुसोमनो थिनदोंमोन आरो दाबोराव बुरैखौ हराव जसोमहोनानै अखानायै बोराइया “बुरिहा गोरलै जोनोम जाबाय” होननानै खिन्थालाबायनो थांखि लादोंमोन। बे थांखियै नों एहेम बोराया गामिनि सेंग्रा सिख्लाफोरखौ गय जानानै मुजुदैखौ दाबोराव मुजुसोमनो लिंदोंमोन।

4. आलारि दामब्राया मानिफ्राय माबोरै जोनोम मोनदोंमोन? बिनि मुङा माबोरै आलारि दामब्रा जादोंमोन? बेखौ आरो मा मा मुंजों मिथिबावो ?

फिनः सानसेखालि दे बुरैया सिथलायाव हांगार गोलैनाय नुनानै हासिबजों सिबस्रांब्ला बे सिबस्रांनाय जायगायाव सोरगोनिफ्राय गय थाइसे फाथै गांसे जलदब गोग्लैफैनायखौ मोननानै दा बोराइ फैब्ला सानैजों खावनानै जालायसिगोन सानना जलंगायाव बोननानै दोनो। माथाय उनाव बोराइया नवाव फैब्ला बुरैया गाव जलंगायाव गय फाथै दोननायखौ बोराइनो खिन्थानो बावो आरो बेयावनो सान जखायनै जानायनि उनाव हरसेखालि बोराइ बुरैया जलंगायाव ख ख सोदोब खोनानानै एनजर हाबदों सानना जलंगायाव अखानायै बेखेवना नायब्ला सासे हौवासा गथ’ गोरलै मोजां गावदांदां जारौ रौ नुनायसै। बे गावदांदां जारौ रौ गथ’वानो जादों एहेम बोराइ आरो दे बुरैनि नायल’ जाल’ सासेल’ फिसा हौवा। गथ’खौ नुनानै एहेम बोराइ आरो दे बुरैया रंजाखांनायसै। बबेखानि बेबादिनो आलारि दामब्रानि जोनोमा जादोंमोन। 

एहेम बोराइ आरो दे बुरैनि गथ’वा मद’द’ गब्ल’फुनाय समाव गामिनि सिख्लाफोरा बामहैना नों मा मुं लानो बैसागु ना बाथा बोराइ ? बेबादि मोनब्रै मोनबासो सोंब्ला खर’ सिथियो। उनाव सासे सिख्लाया नों आलारि दामब्रा मुं लानो नामा होननानै सोङो, होनब्लासो गथ’वा खर’खौ थेद खालामो। बेनिफ्रायनो गथ’नि मुखौ आलारि दामब्रा दोननायसै।

 बिखौ आलारि दामब्रानि अनगायैबो गिलारि दामब्रा होननानैबो मिथिबावो।

5. सल’नि गिला फिथाइया बबे हाजोआव माबोरै थायना दंमोन? बेखौ एहेम बोराइया माबोरै लाबोनो हादोंमोन ? लाबोनाय समाव लामायाव मा जाथाइ जादोंमोन ?

फिन: सल’नि गिला फिथाइया मायनागिरि हाजोआव  थाइसे गंग्लाना थायना दंमोन। 

एहेम बोराया फिसाज्ला आलारि दामब्रा थोननायलाय गिला फिथाइ लायनो मायनागिरि हाजोआव थांनायसै। थाङै थाङै थांनानै मायनागिरि हाजोआव सहैब्ला गिला फिथाइ थाइसे गाहायाव गंग्लायनाय नुनायसै । बोराया खानो नागिरब्ला गिला फिथाइया गोजौआव दावखोलांनायसै । बियो आज्लंबायदोंमोन। थेवबो मोनहास’आखिसै। होमब्लासो बोराइया फिसाज्ला खिन्थाहरनाय बादियै बुंनायसै “दहाय आलारि दामब्रानि।” नों आंनि फिसा आलारि दामब्रानि गिला फिथाइब्ला आंजो खाजागोन आरो बिनि नडाब्ला जौसिनबावगोन। बोराया बेबादि होनब्ला गिला फिथाया गाहायाव गंग्लायफिननायसै। होमब्लासो बोराया गिला फिथाइखौ थाब खानानै न’फारसे थाबायबोनायसै । 

लामा लामा थाबायबोब्ला गिला बेगरा थब गोलैखोमानानै माब्लाबानो आलारि दामब्रानि गस्ला सिफियावसो हाबफैजोबनायसै। बेखौ बोराया मिथियाखैमोन। न’आव सफैनानै गिला फिथाइखौ फिसाज्लानो होनो नागिरोब्ला गिला बेगरा गरसेबो गैलिया। “हाबाव, मा जाखोलै होमब्ला आंनि गिला लाबोनाया ? माथो गरसेबबो सफैयाखिसैलै। बिदि होनब्ला, “नै लै आफा, नोंनि गिला लाबोनाया आंनि गसला सिफियावसो हाबफैजोबबाय।” बोराया सोमोनांबाय, खर’ बोरै जाखो बिलाय होनना गोमोहाबबाय। बेबादि जायामानो गिला फिथाइ लाबोनाय समाव लामायाव जादोंमोन।

6. लावखार गथ ‘फोरजों गिला गेलेब्ला आलारि दामब्राया मा मा गोमोथाव हाबा मावदोंमोन ? बिनि गिलाया माबोरै आसागि बैसागिनि न’ मोनहैदोंमोन ? बे गिलाया आसागि बैसागिनि मा खहा खालामदोंमोन ?

फिन: लावखार गथ’फोरजों गिला गेलेब्ला आलारि दामब्राया जोबोद गोमोथाव गोमोथाव हाबा मावदोंमोन। गेलेनाय समाव लोगोफोरखौ गिला साहोनानै बिससोरखौ दाबसेथिंजाय मोखां जाहोनानै आलारि दामब्राया गिला सानायखौ गावगासिनो गावनानै गिलाखौ सोखावजोबो। गथ’फोरा नायफिननानै गिलाखौ गावजोबनाय नुब्ला बिसोर बयबो आलारि दामब्राखौ दुब-दुब दाब-दाब बुनायसै। होमब्ला आलारि दामब्राया लोगोफोरखौ दाबसेथिं नायहरफिननो थिनना गिला फिथाइफोरखौ मोजां खालामफिनदोंमोन। 

सानसेखालि आलारि दामब्राया गिला गेलेबाय थानायाव गिला गावगासिनो एं-उर होनलांनानै साथेनानै दोननाय गिला बेगरखौ सौख्रुबसे सौख्रुबनानै एं-एं थांनानै आसागि बैसागिनि न’ मोनहैदोंमोन। 

गिलाया आसागि बैसागि सिख्लाफोरनि सि दानायावसो खुन्दुं सौस’नानै नवाव थ्रोब हाबहैदोंमोन। बे गिलाया आसागि बैसागिनि जिनि खुन्दुंखौ बस’लांदोंमोन। बेबादिनो आलारि दामब्रानि गिलाया आसागि बैसागिनि खहा खालामदोंमोन।

7. आसागि बैसागिया सोरमोन ? बिसोर मा मा खामानियाव माबादि आखा- फाखामोन?

फिनः आसागि बैसागिया खुरिया बोराइ आरो खुरिया बुरैनि फिसाजोमोन। बिसोरहा बावबुलि राजा मुंनि सासे बिदा दंमोन। 

बिसोर बिब’ बिनानाव सानैबो दानो लुनो जोबोद आखा- फाखामोन। बिब’वा सिथला गेजेराव जनानै बिनानावनो- नै दाउ मैना बिरलांबाय होनना खोन्था हरब्ला बिनानावा थाबनो दाउ मैनानि आगरखौ सियाव दैखाङोमोन। नै दाउराय बिरलांबाय होनब्लाथाय सियाव थाबनो दावरायना आगार दैखाङोमोन। बिदिनो बिब’वा नै मै गाबदों होनब्लाथाय बेखौबो थाबनो जियाव एरलाङोमोन। दानायाव लुनायाव जैरै आखा-फाखा, दामनाय मोसानाय, मेथाइ खननाय आरो हाबा-हुखायावबो आसागि बैसागिया रावनिबो गेजेन नङामोन।

8. आलारि दामब्राया मानो आरो माबोरै आसागि बैसागिनि नआव सहैदोंमोन ? बिनि बिफाया आसागि बैसागिनि नआव मानो थांनोगोनां जादोंमोन?

फिनः सानसेखालि आलारि दामब्राया लावखार गथ’फोरजों गिला गेलेबाय थानायाव गिला गावगासिनो एं-उर होनलांनानै साथेनानै दोननाय गिला बेगरखौ सौख्रुबसे सौख्रुबनानै एं-एं थांनानै आसागि बैसागि सिख्लाममोननि सि दानायावसो खुन्दुं सौस’नानै बिसोरनि नवाव थ्रोब हाबहैदोंमोन। बेबादयैनो आलारि दामब्राया  आसागि बैसागिनि न’आव सौहैदोंममोन।

आलारि दामब्रानि गिला बेगरा जेरै एं-एं होननानै हाफाव हाला सिंखावलांदों बेथिङै थाङै थाङै थांनानै आसागि बैसागिनि सि दानायावसो सौहैनायसै । बिनिफ्राय गिला खारलांनायनि हांखो नुयैलाय दसे गसंनानै आसागि बैसागिनियाव सोंनायसै – नोंसोर ओरैहाय गिला खारबोनाय नुदों नामा? आसागि बैसागिया आलारि दामब्रानि मोखांखौ नुनानै गोसो थोखांनायसै। बिनि बिमा बिफाया जोंखौ नायफैब्ला हामगौ साननायसैनो। नाथाय लाजिगुसु सिख्लाफोरा बाथ्राखौ बोरै रायथिलायखो ? उनाव बिफाया फैनांथों साननानै सानैबो बुंनायसैनो – मानोसै नोंनोलाय? नुदोंबो नुवाखैबो जों। थोनहर नोंनि नोमफाया; होमबासो गिलाखौ मोनलांगोन। आलारि दामब्राया खर’ खुरै खुरै लुसुर लुसुर फैनांफिनबाय। नआव फैनानै बिफाखौ बुंफैनायसै- आफालै, आंनि गिलाखौ आसागि बैसागिया लाखिबाय। हराखिसै। आंखौसो बुनानै हरबाय। नों लायदो। बिफाया बाथ्राखौ खोनानानै जोबोर दुखु मोनबाय। “बोराइ समाव इसोरनियाव बियै बियै गथ’ सासे मोननायखौलाय हावरियानि फिसा होननानै मानो जायनो मोनो बियो बुयोसोलाय आंनि फिसाखौलाय” होननानै दुखु लानानै बोराइया गिला बेगरखौ लायनो थांनायससै। बेबादियैनो आलारि दामब्रानि बिफाया आसागि बैसागिनि न’आव थांनोगोनां जादोंमोन।

9. आसागि-बैसागिखौ फिसाज्ला आलारि दामब्रानो हाबा खालामनो थाखाय माबोरै आरो खेबबेसे थांदोंमोन ? बे समाव मा मा जाथाइ जादोंमोन ?

फिन: आसागि बैसागिखौ फिसाज्ला आलारि दामब्रानो हाबा खालामनो थाखाय बोराया सानसेखालि गामिनि सासे सानैसो लानानै आसागि बैसागिखौ नायनो थांनायसै। न’आव सहैब्ला बार’हात खुलिनि सैमा हेंगालिया फौ फौ सोहरनायसै। आसागि बैसागिया मानसिफोरखौ नुनानै हाखु दाखु खामफ्लाइ बना होनायसै। खारनलाय खारखोलाय थांखु लागायनानै होफैनायसै। बयबो ज’ जनानै आसागि बैसागिनि बाथ्रा रायज्लायब्ला बावबुलि राजाया बुंनायसै- बे जानो हाया, आं थासानदियाव आंनि बिनानाव आसागि बैसागिखौ गिलारिया हाबाआ खालामनो हानाय नडा। बाथ्राखौ खोनानानै आसागि बैसागिया न’ सिडाव थांनानै फे-फे, फु-फु गाबखोमानायसै। एहेम बोराइया मोखां सायर’ जानानै नआव फैफिननांनायसै। बेनि साननै सानथाम थानानै बोराइया अरोबाव मानसि हादुंगोराफोरखौ लानानै बावबुलि राजानि न’आव आसागि बैसागिखौ नायनो नैथि खेब थांफिनबावदोंमोन। 

बे खेबाव थांनायसै दाउब’ राजा, दाउखा राजा, सिखोना राजा, माहादेब राजा, स’ना राजा, रुफा राजा आरो सोरबा सोरबाफोर। बिसोर गासैबो सहैब्ला बार’हात खुलियाव थानाय सैमा हेंगालिया फौ फौ सोंलायबाय। सैमा सोंनाय खोनानानै आसागि बैसागिया हाखु दाखु न’ सिंनिफ्राय बार’ननानै आजलं गोदोना फोलाउनानै लामाथिं नायहरब्ला एहेम बोराइखौ नुहरनायसै। नुहरनानै हाखु-दाखु खारनलाय खारखोलाय खामफ्लाइ दखला थाम थिम खालायनानै दोननायसै। उनाव बिसोरबो सहैनानै खामफ्लाइयाव जनायसै। बावबुलि राजायाबो जदेरफाहैनायसै। हादुं गोराफोरनि बाथ्रायाव बावबुलि राजाया गंग्लायनांनायसै आरो बिनानाव आसागि बैसागिखौ गिलारि दामब्राया गोरजिया थानायनि रादाय खानांनायसै।

10. बावबुलि राजाया सोरमोन ? आसागि-बैसागिखौ बियो आलारि दामब्राजों हाबा जानायाव मानो हेंथा होदोंमोन ? उनाव माबादियै सिमान जानांदोंमोन ?

फिनः बावबुलि राजाया आसागि बैसागिनि बिदामोन।  

बावबुलि राजाया बिनानावा आसागि बैसागिखौ सिंजों सिं मोजां मोनखौमादोंमोन। बेनिखायनो बियो आसागि बैसागिखौ गाव हाबा लानो थाखाय आलारि दामब्राखौ हाबा जानायाव हेंथा होदोंमोन। 

जेब्ला आसागि बैसागिखौ नायफैनो थाखाय आलारि दामब्रानि बिफा एहेम बोराइया गामिनि सानैसो लोगो लानानै थांदोंमोन अब्ला बिदा बावबुलिया गाव थासानदियाव बे खामानिया माब्लाबाबो जानो हाया होननानै बुंदोंमोन। एहेम बोराइया मोखां सायर’ जानानै नआव फैफिननांनायसै। साननै सानथामनि उनाव एहेम बोराया आरोबाव खेबसे गामिनि हादुंगोराफोरखौ लानानै आसागि बैसागिखौ सोंनो थांबावो। बे खेबाव बिसोरजों लोगोसे थांफादोंमोन दाउब’ राजा, दाउखा राजा, सिखोना राजा, महादेब राजा, सना राजा, रुफा राजा, आरो गोबां। हादुंगोराफोर थांनायलाय बे खेबाव बिदा बावबुलिया जेबो हेंथा होनो हायासै। बावबुलि राजाया उनथाराव हादुंगोरानि बाथ्रायाव खर’ गंग्लायनो गोनां जानानै बिनानाव आसागि बैसागिखौ आलारि दामब्राया गोरजिया थानायनि रादाय खानांनायसै। बेबादियैनो आसागि-बैसागिखौ बियो आलारि दामब्राजों हाबा जानायाव हेंथा होदोंमोन आरो उनाव सिमान जानांदोंमोन।

11. आलारि दामब्राया आसागि- बैसागिजों हाबा जानायनि सिगां बिसोरनि बिमा बिफानि नआव माबादि गोरजिया थानांदोंमोन ? आसागि बैसागिनि बिमा-बिफाया सोरमोन ?

फिनः गोरजिया थानाय हाबाया बर’ समाज जों गगानायजानाय मोनसे रोखोमनि बर’फोरनि जुलि एबा हाबा जानायनि खान्थि।बर’फोरनि गोदोनि गोरजिया थानाय हाबा जानाय खान्थि बादियैब्ला गिबियावनो हौवा जागोना हिनजावनि नवाव गोरजिया थाग्रोना बिसोरनि नवाव मावै-दाङै दिन्थिग्रोनांगौमोन। हौवा गोदाननि मावनाय-दांनायखौ मोजां मोनब्लासो बै हौवानो हिनजाव एबा सिख्लाखौ दिहुनना हरनाय जायोमोन। थिग बेबादिनो गोरजिया थानाय खान्थिजों आलारि दामब्रानि हाबायाबो जादोंमोन बनिखायनो आलारि दामब्राया आसागि बैसागिजों हाबा जानायनि सिगां बिसोरनि नवाव रादाय बादियै थफ्ला फिसा लानानै गोरजिया थाहैनो गोनां जादोंमोन। गाव बोननानै लांनाय थफ्ला फिसाखौ एहेम बोराइनि फिसाज्ला आलारि दामब्राया आसागि बैसागिनि बिमा बिफानि न’आव सहैना आसागि बैसागिया आथिं सुनो दै होफैयो आरो न’ गंसेयाव दोनहैयो। बेबादिनो मावै थाङै बोसोरसे थांब्ला अलारि दामब्रानो आसागि बैसागिखौ दिहुनना हरो।

आसागि बैसागिनि बिमा बिफाया जाबाय खुरिया बोराइ आरो खुरिया बुरै।

12. आलारि दामब्रानि हाबाया मा खान्थियै माबादियै जादोंमोन ?

फिनः आलारि दामब्रानि हाबाया गोरजिया थानाय खान्थिजों जादोंमोन। बियो आसागि बैसागिनि नख’राव बोसोरसे मावै दाङै दिन्थिनानैसो हाबा खालामनो मोनदोंमोन। 

बर’फोरनि गोदोनि गोरजिया थानाय खान्थिजों हाबा जानाय खान्थि बादियैब्ला गिबियावनो हौवा जागोना हिनजावनि नख’राव गोरजिया थाग्रोना बिसोरनि न’आव मावै-दाङै दिन्थिग्रोनांगौमोन। हौवा गोदाननि मावनाय-दांनायखौ मोजां मोनब्लासो हिनजावनि नखारा हौवानो हिनजावखौ दिहुनना हरोमोन। थिग बेबादि खान्थियैनो आलारि दामब्रा खुगा सल’आव आलारि दामब्रानि हाबायाबो जादोंमोन। बेनिखायनो आलारि दामब्राया आसागि बैसागिजो हाबा जानायनि सिगां बिसोरनि न’आव रादाय बादियै थफ्ला फिसा लानानै गोरजिया थाहैनांदोंमोन। गाव बोनसाबनानै लांनाय थफ्ला फिसाखौनो एहेम बोराइनि फिसाला आलारि दामब्राया खुरिया बोराइ आरो खुरिया बुरैनि नवाव थाहैनायसै। बेबादिनो मावै दाङै बोसोरसे जानायनि उनावसो अमलारि दामब्रानो आसागि बैसागिखौ दिहुनना हरदो़मोन।

आसागि बैसागिखौ आलारि दामब्रानो दिहुनना हरनाय समाय जोबोर हाबा गिदिर खालामदोंमोन। हाबायाव खाम, सिफुं, जथा, सेरजा दामनानै हाबाखौ गोमसार होदोंमोन। आसागि बैसागिमोननि जायगानि गासै हौवा हिनजाव, बोराइ-बेन्थ’, सेंग्रा-सिख्ला, गथ’- गथाइ थांनानै जौ लोंहैदों, माइब्रा- अफ्रि जादों। बेदरनि बेदर, ओंखामनि ओंखाम जादों लोंदों, गय देदेरे, फाथै सिनारि, साम’ खिंखिरि सुनै- जानानै जायगानि सेंग्रा- सिख्ला, बोराइ-बुरै, गगथ’-गथायफोरा जोबोर रंजादों बाजादोंमोन। बर’ बोराइफोरा बुङो- जौनि फुख्रि , ओंखामनि आलि, बेदरनि आखाय मा जालु एमबु खुगा बुंनाय  बादिनो आलारि दामब्रा आरो आसागि बैसागिमोननि हाबायाबो बेबादि जानाय लोंनायनि गेजेरजों दुम-दुम दाम-दाम जानानै थांदोंमोन।

13. हाबानि उनाव गिलारि दामब्राखौ सिथारनो बावबुलि राजाया मानो आरो खेबबेसे मा मा राहायै सिथारनो नाजादोंमोन। नाथाय मानो आरो माबादियै फेलें जानांदोंमोन ? उनाव बावबुलि राजाहा मा जाखो ?

फिन: हाबानि उनाव आलारि दामब्राखौ आसागि बैसागिनि बिदा बावबुलि राजाया खेब ब्रै गुबुन गुबुन राहाजों सिथारनो नाजादोंमोन। 

गिबि खेबाव बावबुलि राजाया आलारि दामब्राखौ ना होनो लोगो लादोंमोन। बावबुलिनि सानदोंमोनदि ना होनायाव गाव गोलेर जानानै जेयाव नांफैगोन आरो बेनिफ्राय गिलारि दामब्राया ना होननानै हमोब्ला गाव बिखौ अरथारगोन। नाथाइ बेनि साननाया फेलें जादोंमोन। मानोना आसागि बैसागिया। फिसाइ आलारि दामब्राखौ बुंखा हरदोंमोनदि- आलारि दामब्राया नाखौ हमालासिनो बोरियाव ज’बाय थानांगौ आरो जेब्ला गोलेरा जेयाव नांफैयो अब्ला गोलेरखौ आखाइजों हमालासिनो जंजों बे सुना होनांगौ। बेबादिनो आलारि दामब्रायाबो खालामदोंमोन अब्लाना गोलेरा आं बावबुलि राजासो होनना बुब्ला आलारिया हे दोहोरोम गुमैसोलाय होनना बोरियाव  दिखांब्ला बावबुलिया ग्रोब मानसि जाफिनदोंमोन। 

नैथि खेबाव सानसेखालि बावबुलि राजाया आलारिखौ मै होनो लिंबावदोंमोन। बे खेबाव बावबुलि राजानि थांखिया जादों गिलारिखौ जे साथेनानै मै जमहोनाय आरो गाव मोसा जाना मैखौ होना लाबोगोनाय। गिलारिया मैखौ जेब्ला सुगोन अब्ला बिखौ मोसा जाना अरथारगोन। नाथाय बे खेबावबो बावबुलिया फेलें जादोंमोन। मानोना बे खेबावबो आसागि बैसागिया फिसाइ आलारिखौ बुंखा हरदोंमोनदि- जाहाथे आलारिया मैखौ सुवाबालानो बिफां सायाव गाखोना थायो आरो जेब्ला मैआ जेआव नांफैयो अब्ला मैखौ सुवाबालानो मोसा फैब्लासो मोसाखौ सुयो। बेबादिनो आसागि बैसागिनि बुंहरनाय बादियै आलारि दामब्राया बिफां सानिफ्राय जेआव नांनाय मैखौ सुवाबालानो मोसाखौसो बिफां सानिफ्राइ थांखि हरो। अब्ला बावबुलि राइथाया आंसो होनना बुनायाव आलारिया हे गुमैसोलाय होनना जंखौ बखना होयो अब्ला बावबुलि राजाया ग्रोब मानसि जाफिनो। 

थामथि खेबाव, खननै नाजानायनि उनावबो सिथारनो हायिलाय बावबुलि राजाया आरोबाव दाय खालामनानै गिलारिखौ हुहुरनो सानखांदोंमोन। बियो आलारिखौ बुंनायसै – “दिनै नोडो हाम्रा एवसि एवनानै साथदुलि बेसरखौ फोजोबथानांगौ”। बुंनाय बादियै आलारिया एवसि एवनानै साथदुलि बेसरखौ हा दरसेयावनो फोजोबथारनायसै। बावबुलिया बे हा दरसेयावनो साथदुलि बेसरखौ खनखांफिननानै साथ दुलिखौबो गोदोनि बादि थिब थिब बुंहोफिननो थिननायसै। आलारिया थिननाय बादियै दाउथु दंनायमानिखौ लिंहरनानै खनखांजोबनायसै। धाथाइ खनखांजोबब्ला साथदुलि जाजोबनो दुलिसेया एसे थाबावनायसै। मानोना दाउथु मासेया थप्लायाव लानानै दङ’। दुलि बुंजोबैखाय आलारिया दाउथु माफ्रोमखौबो थथलायाव सेग्रोमजोबनायसै । सेग्रोमै सेग्रोमै दाउथु मासेनि थथलायाव ब्रायैनो बेसरखौ मोनदांमारनायसै । अब्लासो बिनिफ्राय साथदुलि बेसरा गोदोनिबादि थिब थिब जाफिननायसै । बावबुलि राजायानो बेबादि खालामदोंमोन, नाथाइ बेनि साननाया बे खेबावबो फेलें जानायसै। 

ब्रैथि खेबाव, सानसेखालि बावबुलि राजाया गिलारिखौ बुंनायसै – “गावोन फुडाव नों आंखौ दैखरनि दै खावनानै थुखैनांगोन”।  आसागि बैसागिया फिसाइनो बुंखादोंमोनदि – “नों दिनै हराव बे दैखर खाथियावनो गुबुन दैखर खरसे खु’ननानै सायाव आबजाफोर होनानै थ्राय थ्राय हा सारनानै दोन। बेनिफ्राय बेनि सायावनो खामफ्लाइ गंसे लासैनो बनानै दोनखा। जेब्ला नोंखौ दै खावनो थिनगोन, होमब्ला नों बिखौ बे खामफ्लाइयाव जनो थिन। बे खामफ्लाइयाव जब्लानो बियो गोलैलांगोन। अब्लानो बियो लेंग्रा लेंथा जागोन। आसागि बैसागिनि बाथ्रा लानानै आलारिया हराव दैखर खाथियावनो गुबुन खरसे खुरखोमानानै सायाव आबजाफोर होथेनानै थ्राय थ्राय हा होनानै दोननायसै । आरो बेनि सायाव खामफ्लाइ गंसे बनानै दोननायसै। अखानायै बावबुलिया गावखौ थुखैनो आलारिखौ लिंहरनायसै। सानैजों दैखराव सहैब्ला बावबुलिया आलारिखौ दै खावनो थोननायसै। गिलारियाबो बावबुलिखौ थुखैनो होननानै खामफ्लाइयाव जनो थोननानै गाव दै खावफ्लानाय बादि फाव खालामनायसै। बावबुलिया खामफ्लाइयाव जनायनि लोगो लोगो दैखर सिङाव गोलैलांङो।

बेबादिनो बावबुलिया अलारि दामब्राखौ खेब ब्रै फाव फान्दायना गुबुन गुबुन राहाजों सिथारनो नाजादोंमोन। नाथाइ आसागि बैसागिनि फिसाइ आलारिखौ फुंखा हरनायाव आलारि दामब्राया बैफोर जाथाइनिफ्राय बारग’यो आरो बावबुलि राजानि आलारिखौ सिथारनो साननाया फेलें जादोंमोन।

बेबादिनो दैराव गोग्लैनानै बावबुलि राजाया आखाइ खंगा, आथें लेंग्रा जानानै थादोंमोन। बेनिफ्राय आलारि दामब्राया आसागि बैसागिखौ लानानै खारलांदोंमोन। 

14. नाजानानैबो सिथारनो हायियाव बावबुलि राजाया आलारि दामब्राखौ मा खामानि होनानै माबोरै दाय हमनो नाजादोंमोन ? बेबादि खेबबेसे मा मा राहायै दाय हमनो नागिरदोंमोन ? नाथाय खेबफ्रोमबो माबादियै मानि थाखाय फेलें जानांदोंमोन ?

फिन: खननै नाजानायनि उनावबो सिथारनो हायिलाय बावबुलि राजाया आरोबाव दाय खालामनानै गिलारिखौ हुहुरनो सानखांदोंमोन। बियो आलारिखौ बुंनायसै – “दिनै नोडो हाम्रा एवसि एवनानै साथदुलि बेसरखौ फोजोबथानांगौ”। बुंनाय बादियै आलारिया एवसि एवनानै साथदुलि बेसरखौ हा दरसेयावनो फोजोबथारनायसै। बावबुलिया बे हा दरसेयावनो साथदुलि बेसरखौ खनखांफिननानै साथ दुलिखौबो गोदोनि बादि थिब थिब बुंहोफिननो थिननायसै। आलारिया थिननाय बादियै दाउथु दंनायमानिखौ लिंहरनानै खनखांजोबनायसै। धाथाइ खनखांजोबब्ला साथदुलि जाजोबनो दुलिसेया एसे थाबावनायसै। मानोना दाउथु मासेया थप्लायाव लानानै दङ’। दुलि बुंजोबैखाय आलारिया दाउथु माफ्रोमखौबो थथलायाव सेग्रोमजोबनायसै । सेग्रोमै सेग्रोमै दाउथु मासेनि थथलायाव ब्रायैनो बेसरखौ मोनदांमारनायसै । अब्लासो बिनिफ्राय साथदुलि बेसरा गोदोनिबादि थिब थिब जाफिननायसै । बावबुलि राजायानो बेबादि खालामनानै दाय हमनो नाजादोंमोन। नाथाइ बिनि दाय हमनो नाजानाया बे खेबावबो फेलें जानायसै। 

बेनि अनगायैबो बावबुलि राजाया गिलारि दामब्राखौ गुबुन गुबुन राहाजों सिथारनो नाजादोंमोन –

गिबि खेबाव बावबुलि राजाया आलारि दामब्राखौ ना होनो लोगो लादोंमोन। बावबुलिनि सानदोंमोनदि ना होनायाव गाव गोलेर जानानै जेयाव नांफैगोन आरो बेनिफ्राय गिलारि दामब्राया ना होननानै हमोब्ला गाव बिखौ अरथारगोन। नाथाइ बेनि साननाया फेलें जादोंमोन। मानोना आसागि बैसागिया। फिसाइ आलारि दामब्राखौ बुंखा हरदोंमोनदि- आलारि दामब्राया नाखौ हमालासिनो बोरियाव ज’बाय थानांगौ आरो जेब्ला गोलेरा जेयाव नांफैयो अब्ला गोलेरखौ आखाइजों हमालासिनो जंजों बे सुना होनांगौ। बेबादिनो आलारि दामब्रायाबो खालामदोंमोन अब्लाना गोलेरा आं बावबुलि राजासो होनना बुब्ला आलारिया हे दोहोरोम गुमैसोलाय होनना बोरियाव दिखांब्ला बावबुलिया ग्रोब मानसि जाफिनदोंमोन। 

नैथि खेबाव सानसेखालि बावबुलि राजाया आलारिखौ मै होनो लिंबावदोंमोन। बे खेबाव बावबुलि राजानि थांखिया जादों गिलारिखौ जे साथेनानै मै जमहोनाय आरो गाव मोसा जाना मैखौ होना लाबोगोनाय। गिलारिया मैखौ जेब्ला सुगोन अब्ला बिखौ मोसा जाना अरथारगोन। नाथाय बे खेबावबो बावबुलिया फेलें जादोंमोन। मानोना बे खेबावबो आसागि बैसागिया फिसाइ आलारिखौ बुंखा हरदोंमोनदि- जाहाथे आलारिया मैखौ सुवाबालानो बिफां सायाव गाखोना थायो आरो जेब्ला मैआ जेआव नांफैयो अब्ला मैखौ सुवाबालानो मोसा फैब्लासो मोसाखौ सुयो। बेबादिनो आसागि बैसागिनि बुंहरनाय बादियै आलारि दामब्राया बिफां सानिफ्राय जेआव नांनाय मैखौ सुवाबालानो मोसाखौसो बिफां सानिफ्राइ थांखि हरो। अब्ला बावबुलि राइथाया आंसो होनना बुनायाव आलारिया हे गुमैसोलाय होनना जंखौ बखना होयो अब्ला बावबुलि राजाया ग्रोब मानसि जाफिनो। 

जोबथारनायाव, सानसेखालि बावबुलि राजाया गिलारिखौ बुंनायसै – “गावोन फुडाव नों आंखौ दैखरनि दै खावनानै थुखैनांगोन”। आसागि बैसागिया फिसाइनो बुंखादोंमोनदि – “नों दिनै हराव बे दैखर खाथियावनो गुबुन दैखर खरसे खु’ननानै सायाव आबजाफोर होनानै थ्राय थ्राय हा सारनानै दोन। बेनिफ्राय बेनि सायावनो खामफ्लाइ गंसे लासैनो बनानै दोनखा। जेब्ला नोंखौ दै खावनो थिनगोन, होमब्ला नों बिखौ बे खामफ्लाइयाव जनो थिन। बे खामफ्लाइयाव जब्लानो बियो गोलैलांगोन। अब्लानो बियो लेंग्रा लेंथा जागोन। आसागि बैसागिनि बाथ्रा लानानै आलारिया हराव दैखर खाथियावनो गुबुन खरसे खुरखोमानानै सायाव आबजाफोर होथेनानै थ्राय थ्राय हा होनानै दोननायसै । आरो बेनि सायाव खामफ्लाइ गंसे बनानै दोननायसै। अखानायै बावबुलिया गावखौ थुखैनो आलारिखौ लिंहरनायसै। सानैजों दैखराव सहैब्ला बावबुलिया आलारिखौ दै खावनो थोननायसै। गिलारियाबो बावबुलिखौ थुखैनो होननानै खामफ्लाइयाव जनो थोननानै गाव दै खावफ्लानाय बादि फाव खालामनायसै। बावबुलिया खामफ्लाइयाव जनायनि लोगो लोगो दैखर सिङाव गोलैलांङो।

बेबादिनो बावबुलिया अलारि दामब्राखौ खेब ब्रै फाव फान्दायना गुबुन गुबुन राहाजों बुथारनो नाजादोंमोन। नाथाइ आसागि बैसागिनि फिसाइ आलारिखौ फुंखा हरनायाव आलारि दामब्राया बैफोर जाथाइनिफ्राय बारग’यो आरो बावबुलि राजानि आलारिखौ सिथारनो साननाया फेलें जादोंमोन।

15. आलारि दामब्राया बावबुलि राजानिफ्राय बारग’नो आसागि बैसागिखौ लानानै माबोरै बबेथिं खारलांदोंमोन ? बावबुलि राजाया बिसोरनि उनसंनानै माबादि बबे लामाजों होसो लांदोंमोन ? बे समफारिया मा बोथोरमोन ? बै समफारियाव बिसोर बबेयाव थानांदोंमोन ?

फिनः आलारि दामब्राया बावबुलि राजानिफ्राय बारग’नो आसागि बैसागिखौ लानानै अख्रां सा सा खारलांदोंमोन। बेबादिनो आलारि दामब्राया बैसागु अखाफोरनिफ्राय भादोर अखाफोरसिम आसागि बैसागिखौ लानानै खारलांदोंमोन। उनाव आसागि बैसागिहा बे समाव मोदोमाव दंसैमोननो। बेनिखायनो बारा बारा मेंनाय मोननानै ग्रोबनो बालाबारियाव बिरख्लायनानै जिरायनायसै।

बिसोर खारब्ला बावबुलि राजायाबो बारहुंखा, सार’न्थाइ जानानै  बिसोरनि उनसंनानै बिसोर थांनाय लामाजोंनो उन उन होसोलांदोंमोन । बिसोरबो अखर्खा सा सा बिरलांनायसै । बिबो दुम दुम, दाम दाम होसोगासिनो थानायसै।

आलारि दामब्राया बावबुलि राजानिफ्राय बारग’नो आसागि बैसागिखौ लानानै अख्रां सा सा खारलांनाय समफारियाव बैसागु अखाफोर निफ्राय भादोर अखाफोरनि बोथोरमोन।

बैसागु अखाफोरनिफ्राय भादोर अखाफोरसिमनि समफारियाव बालाबारियावनो जिरायनानै थानांदोंमोन।

16. बबे अखाफोराव मानो आसागि बैसागिया अख्रां सानिफ्राय बुहुमाव बिरख्लाय बोनांदोंमोन ?

फिन: आलारि दामब्राया जेब्ला आसागि बैसागिखौ लानानै अख्रां सा सा बिरलांदोंमोन अब्ला बावबुलि राजाया बारहुंखा, सार’न्थाइ जानानै  बिसोर बिइरलांनाय दामानि उन उन होसोलांदोंमोन। बेबादिनो बिसोरबो खारै खारैनो बैसागु अखाफोरनिफ्राय भादोर अखाफोरसिम खारनायदोंमोन। बे समाव आसागि बैसागिहा मोदोमाव दंनायलाय बारा बारा मेंनाय मोननानै ग्रोबनो अख्रां साननिफ्राय बुहुमनि बालाबारियाव बिरख्लायबोनांदोंमोन। 

17. बुहुमनि बालाबारियाव बिरख्लायबोनानै आसागि बैसागिया गथ’ गोरलै जोनोम होनायनि अनगायै दैबेसेयै बिदै दैदोंमोन ? बिदैनिफ्राय बेरफ्रुनानै सोरहा मा मा गथ’सा जोनोम जादोंमोन ? बै समाव आसागि बैसागिया बबेयाव दंहैयोमोन ?

फिन: बुहुमनि बालाबारियाव बिरख्लायबोनानै आसागि बैसागिया गथ’ गोरलै जोनोम होनायनि अनगायै आसागिया दावदै दैसे आरो बैसागिया जखायसे दैनै (दै द’) दावदै दैदोंमोन।

आसागि बैसागिया दैनाय बिदैनिफ्राय बेरफ्रुनानै आसागिनि बिदैआ हौवासा जोनोम जादोंमोन आरो बैसागिनि बिदै दैबाया बेरफ्रुनानै साबा हौवासा आरो उनाव बेरफ्रुनाया हिनजावसा सासे जोनोम जादोंमोन।

बै समाव आसागि बैसागिया अख्रां सायाव एबा सोर्गोआव दंहैयोमोन।

18. असागि बैसागिनि फिसाफोरखौ सोरनो दै आदारफोर दौनानै खांनो थाखाय बिबान होदोंमोन ?

फिनः आसागि बैसागिनि फिसाफोरखौ दाउ थि थि थिउनो दै आदारफोर दौनानै खांनो थाखाय बिबान होदोंमोन्।

19. सोरगोआव दै आरो आदारखौ दाउ थि थि थिउआ बिमाफोरनिफ्राय लाबोनाय लामायाव मा दाउआ मानो आरो माबोरै हेंथा होदोंमोन ? बेखौ आसागि बैसागिया मा साव होदोंमोन ?

फिनः जेब्ला आसागि बैसागिनि बिदैया बेरफुनानै फिसा ओंखारजोबनायलाय आदारनि गोनांथि जादोंमोन अब्लाना दाउ थि थि जिउआ अख्रां सायाव बिरदावनानै आसागि बैसागिनिफ्राय आदार लायनो थांनायसै। आसागि बैसागिया बबेयाव हरनो साननानै उनाव थास’लाइयाव जुनानै हरनायसै। दाउ थि थि थिउआ आदार लानानै बिरबोब्ला लामायाव फानफिवालि दाउआ नुनानै थास’लाइखौ खेबसिनानै हरगारनायसै आरो आदारा गासैबो गोग्लैजोबनायसै । दाउ थि थि थिउआ बिलाइ गिजियाव जा इसे थाबथानानै थादोंमोन बेखौनो लाबोनानै आसागि बैसागिनि फिसाफोरनो होफैनायसै। बिसोरबो बेखौनो बयबो सोलानानै थानायसै।

फानफिवालि दाउआ लाइ खेबसिनानै आदार सेनानै जाना आसागि बैसागिनि गथ’फोरखौ उखै होनायनि थाखाय आसागि बैसागिया बिखौ एरैबादि साव होददोंमोन- “नों जेरै जोंनि फिसाफोरखौ आदार उखैहोदों बेबादिनो नोंबो जेब्लाबो दै गांबाय थागोन, आदार उखैबाय थानानैनो थांबाय थागोन”। दा बेनिखायनो फानफिवालि दाउवा अखा हाब्लाबो फिउ फिउ होननानै अखा लिंहर नांगौनो। थेवबो बिहा दै गांगाया जाबाय।

20. आसागि बैसागिनि गथ’साफोरनि मुङा मा मामोन ?

फिन: आसागि बैसागिनि गथ’साफोरनि मुंफोरा जाबाय-

आसागिनि फिसाज्लानि मुङा जाबाय “हौ हौ”।

बैसागिनि गथ’फोरनि मुंफोरा जादों गिबिया रांरासि, बिनि आनजाइया फारियै बारिगंथाम, मैथा हाजि, बारथेफाइ, गलाफारसै आरो दुइसिनथारा जादों बार थिरसाइ, बेनो हिनजावसामोन।

21. आलारि दामब्रा मुंनि सल’ बाथाया बर’ बाथौ धोरोमजों मा लोब्बा दं बिजिरना दिन्थि। बे सल’ बाथानि आखुफोरनि मुंफोरा बाथौ धोरोम आरो बर’ आसार खान्थिनि मा गुमुर होनो हायो ?

फिनः “आलारि दामब्रा” मुंनि सल’ बाथाया दोंसे सुबुं सल’ एबा खुगा सल’। बे खुगा सल’निआव बर’फोरनि गुदि बाथौ धोरोमनि गुमुर आरो सुबुं फोथायथिफोर बेरखांथिनायखौ नुनो मोनो। बर’फोरनि आबाद मावनाय, आसार खान्थि आरो हारिमुनि सोमोन्दैबो रोखायै बेरखांथिनायखौ नुनो मोनो। बेनिखायनो बे खुगा सल’आ बर’ हारिनि गुदि बाथौ धोरोमजों लेब्बा दं होनना बुंनो हायो। मानोना बे खुगा सल’आव बर’फोरनि संसार जानाय, हादान सिफायनाय, बायु जानाय, आबादथिलि सायख’नाय आरो आबाद मावनाय,  जुलि एबा हाबा जानाय खान्थि, गिला गेलेनाय, सि जोम दानाय, हिंसा खखालामनाय, अनसायनय, सावहोनाय बायदि बर’ समाजजों सिथाबनानै थानाय माखसे आसार आखु आरो हारिमुनि सावगारिफोरखौ बेरखांनायखौ नुनो मोनो।  

“आलारि दामब्रा” खुगा सल’आव थानाय आखुफोरनि मुंफोरा बाथौ धोरोमआव सिबिजानाय आनान गसाइ ब्रह्मा, बिष्णु आरो महेश्वर जायखौ फारियै रां-रासि, मैथाहाजि आरो बारि खनथाय सल’आव मुंखजानाय आखुफोरनि मुंजों गोरोबलायनाय दं। आरो बे आखु फोरनि गेजेरजों  सुबुं हारि जोनोम जाजेननायनि धोरोम फोथायनायखौबो बेरखांनाय मोननो हायो। बे सल’आव बै आखुफोरनि गेजेरजों बर’ समाजनि रायजो जांनाय, फिसा-फिसौ खांनाय, आबाद मावनाय, गेलेनाय रंजानाय, सि जोम दानाय, हाबा खुंनाय बायदि बायदि बर’ हारिमु आसार खान्थिनि गुमुरखौबो मिथिनो हायो।

22. बै सल’ बाथायाव थानाय बर’ खान्थि मथै साननाय बोथोरनि मा गुमुर आरो सानथौ बेरखां होदों होनना साननो हायो? 

फिन: “आलारि दामब्रा” खुगा सल’ बाथायाव थानाय बर’ खान्थि मादै बोथोरनि माखासे गुमुर सानथौ बेरखांहोदों होनना साननो हायो।

बर’ बोराइ बुरैफोरनि खुगा-खुगा मोनसे फोथायनाय बादिब्ला जे समाव आसागि-बैसागिमोना बावबुलि राजाजों होसो जायो बे समावनो दैज्लां जायो आरो जे समाव बिसोर जिरायो बे समाव मेसें जायो। बेबादियैनो देज्लां आसे मेसें बोथोरजों आलारि दामब्रा सल’बाथाया सोमोन्दो दंलायो। बेनिखायनो आलारि दामब्रा” खुगा सल’ बाथायाव थानाय बर’ खान्थि मादै बोथोरनि माखासे गुमुर सानथौ बेरखांहोदों होनना जों साननो हायो।

23. दैज्लां बोथोर आरो मेसें बोथोरजों “आलारि दामब्रा” सल’ बाथाहा मा सोमोन्दो दं ? “आलारि दामब्रा” आरो रावना रावनिनि सल’ मोननैखौ रुजुनानै बर’फोरनि “अखा हानाय” समनि सुबुं फोथायथिखौ बुंफोरना दिन्थि।

फिनः आसागि बैसागिया खुरिया बोराय आरो खुरिया बुरैनि फिसाजोमोन। बिसोरहा बावबुलि राजा होननाय बिदा सासे दंमोन। बावबुलि राजाया बिनानाव आसागि बैसागिखौ गोसो सिंजों सिरि सिरि हाबा खालामनो सानदोंमोन आरो नाजाददोंमोनबो। नाथाय आसागि बैसागिनि हाबाया आलारि दामब्राजोंसो जादोंमोन। बिदा बावबुलिया सिगां समाव हेंथा खालामदोंमोनब्लाबो हादुंगोरा आरो रायजो राजाफोरनि नारसिननायाव बियो आलारि दामब्राया गोरजिया थानायनि रादाय खानो गोनां जायो। जाहोनाव बियो आलारि दामब्राखौ मेगन सानानै सिरि सिरि सिथारनो गुबुन गुबुन सुलु लाबाय थायो। आसागि बैसागिनि हेफाजाबै आलारि दामब्राया बावबुलि राजानि सिथारनो नाजानाय खैफोद ननिफ्राइ बारगयो आरो सानसेखालि आसागि बैसागानि बुंनाय बादियैनो बावबुलिखौ दैखराव गाब्रहोनानै आखाइ आथिं सेंग्रा खालामना दोनो। बेनिफ्राइ गावसोर आलारि दामबा आरो आसागि बैसागि साथामबो खारखोमालाङो। बिसोर खाआरखोमालांनाय उन उन बावबुलि राजायाबो अखा, बारहुंखा, सारन्थाय जानानै बिसोरखौ होसोयो। 

बर’ बोराइ बुरैफोरनि खुगा-खुगा मोनसे फोथायनाय बादिब्ला जे समाव आसागि-बैसागिमोना बावबुलि राजाजों होसो जायो बे समावनो दैज्लां जायो आरो जे समाव बिसोर जिरायो बे समाव मेसें जायो। बेबादियैनो देज्लां आसे मेसें बोथोरजों आलारि दामब्रा सल’बाथाया सोमोन्दो दंलायो।

24. बे सल’हा बाथौ धोरोमजों माबादि सोमोन्दो दं ? 

फिन:  “आलारि दामब्रा” मुंनि सल’ बाथाया दोंसे सुबुं सल’ एबा खुगा सल’। बे खुगा सल’निआव बर’फोरनि गुदि बाथौ धोरोमनि गुमुर आरो सुबुं फोथायथिफोर बेरखांथिनायखौ नुनो मोनो। बर’फोरनि आबाद मावनाय, आसार खान्थि आरो हारिमुनि सोमोन्दैबो रोखायै बेरखांथिनायखौ नुनो मोनो। बेनिखायनो बे खुगा सल’आ बर’ हारिनि गुदि बाथौ धोरोमजों लेब्बा दं होनना बुंनो हायो। मानोना बे खुगा सल’आव बर’फोरनि संसार जानाय, हादान सिफायनाय, बायु जानाय, आबादथिलि सायख’नाय आरो आबाद मावनाय,  जुलि एबा हाबा जानाय खान्थि, गिला गेलेनाय, सि जोम दानाय, हिंसा खखालामनाय, अनसायनय, सावहोनाय बायदि बर’ समाजजों सिथाबनानै थानाय माखसे आसार आखु आरो हारिमुनि सावगारिफोरखौ बेरखांनायखौ नुनो मोनो।