Essay Writing in Bodo| आथिखालाव बिगियाननि बिहोमा| रनसाइ लिरनाय

Hello Students, We are going to provide the most important essay writing topics for Class 10 to Class 12 students in the Bodo language. This content has been prepared to help students understand essay writing easily and improve their writing skills. These essays are useful for school examinations, board exams, and practice purposes. By studying these important essays, students can develop clear thinking, proper language use, and confidence.

Essay Writing in Bodo| आथिखालाव बिगियाननि बिहोमा| रनसाइ लिरनाय

आथिखालाव बिगियाननि बिहोमा

आथिखालनि मुगाखौ बिगियाननि मुगा होन्नाय जायो। न’खर, बाहेर, जानाय थानाय जेरावबो बिगियाननि आदबफोरा साग्लोबजोबबाय। गामिनि गथ’ गथाय आरो हाल एवग्रानिफ्राय जुरिनानै सुबुं समाजनि बयबो बिगियाननि गोहो आरो आदब खायदाजों हाबा मावनो नांनाय जाबाय। गुबुन हादरनि गोजौ थाखोनि समाजनि खोथाया आलादा, नाथाय जोंनि भारत हादरावबो बिगियानारि आदब खायदाया बयखौबो साग्लोबसारनो हाबाय। बेल’ नङा, बुहुमनि उनफिन्ना थानाय हारिफोरनि गेजेरावबो बिगियाननि गोहोमा एसे नङा एसे गोलैबाय। बेनिखायनो आथिखालाव बिगियान आरो बाहाय बिगियाननि गोहोमा जेरावबो गोलैदों।

बुहुमाव सुबुं हारिनि जौसिन दावगाखांनायनि सोदोमसियाव बिगियाननि बायदिसिना आगजुफोरानो मोनफा मोनफा फोरमान। नाथाय बिगियानगिरिफोरा दाबो _में ग्लियाजासे गोदान गोदान जौगासारि मुवा बेसाद आरो आइजें आइला दिहुनगासिन दं । बिगियाना जौगासारनायनि लोगो लोगो सुबुं समाजनि गोसोनिफ्राय खोमसि फोथायथि आरो गाज्रि हुदाफोरा जोबनांलांनायनि लामा लादों। मानसिनो नांनाय बादि आंखालफोरखौ सुफुंनो बिगियानगिरिया गोदान गोदान बेसाद आरो खाबु दिहुनगासिनो दं । मानसिनि दिहुनथाइफोरा सानसेनो जाफुङाखै । अन्थाइजों एरखुना आबाद मावनायनिफ्राय दिनै ट्रेक्टरजों हाल एवनो हानाय जाबाय। हाल एवनो मोसौ नङाब्लाबो जासै। हाल खदाल नांगाल जुंगालफोरनिफ्राय जोन्थोर जाबाय। हाग्राबारि अन्थाइनिफ्राय अर दिहुन्नो हानायनिफ्रायनो दिनै कल कारखाना, मेसिन, बमा बारुदबादि हाथियार दिहुन्न हानाय जाबाय । दाउ बिरनायखौ नुनानै गां गैयाब्लाबो मानसिया अखां जाहाजजों बाराव बिरनो हानाय जाबाय। टरपेद’नि हेफाजाबजों ना बायदियै दै सिङाव थांनो हानाय जाबाय। टेलिफननि गेजेरजों गोजाननिफ्राय रायज्लायहरनो हानाय जाबाय, फेक्सनि गेजेरजों रादाब आरो सावगारिबो दैथाय हरनो हानाय जाबाय। रेडिअ’नि गेजेरजों गोजानसिम फोसावनो हानाय जाबाय, टिभिनि गेजेरजों नुयिखौबो न’आव जनानै नायनो आरो खोनानो हानाय जाबाय । दासिम फैयै फैयै कम्पिउटार नेटवर्कनि मुगायाव सान्नाय हनाय आरो बुहुमनां नायबिजिरनाय नायगिरनायाव गोरलै जानानै फैबाय। बेबादिनो दै बिगियान दिहुनथाइनि सान्थ्र ‘हायि बिदिन्थि । थारैनो गोमोथाव बिगियान दिहुनथाइनि दावगाखांनायनि जारिमिना।

मानसिनि लुबैनाय जोबागौमानि दिहुनथाइनि बिसानाबो जोबनाय नङा । बुहुम बिखानि बायदिसिना महर आरो बेसादफोरा मानसिनि गोसोखौ लुबैसुलासिन खालामबोदों। बुहुम बिखानि मिथिंगानिफ्रायनो मानसिया बायदिसिना मुवा आरो खाबु दिहुनजेन्नो लादोंमोन आरो दाबो लागासिनो दं। उदां बुहुम बिखाया मानसिनि थाखाय अराय सम गेवलां जानानै दं। मानसिया गावनि सोलो खाथायना नायगिरना लांब्लानो जाबाय। मिथिंगानि बिखायाव थानाय जोबनो गोयै सम्पदफोरखौ मानसिया बिगियाननि मदद लानानै मोनफानि उनाव मोनफा दिहुन्ना बाहायनो लाबाय। आथिखालाव बेबादिनो मानसिया बिगियाननि बोलोजों मिथिंगानि सम्पदफोरखौ बोखांना लानो हाबाय। मानसिनि आखाइयाव मिथिंगानिफ्राय मोन्नाय खाबु खायदाया मानसिनि सायाव बारानिफ्राय बारा गोहोम खोख्लैबाय।
गोदोनि मानसिया मिथिंगाखौ गिना सोलियोमोन। हाग्रानि जिउ जुनारफोर, अखांनि सोगोमनाय जोंब्लाउनायफोरखौ गिना खारखोमायोमोन । दै गिदिर, हाजो, हाग्रामा जाम्फैफोरखौ गिना बेफोरनि गोहोखौ फुजिनांगौ सान्दोंमोन। नाथाय उनाव बिगियाननि दिहुनथाइफोरा मानसिनि गोसोआव जुक्तिनि खराग होनायसै आरो गिनाय बानायफोरखौ उनाव नारगारनो हानायसै । सुबुं हारिया दिनै जानाय थानाय, मावनाय दांनाय जेरावबो बिगियाननि हेफाजाब लाबाय। दिनै रावबो गोदोनि मानसिनि बादि गोथा जालिया, आथिंजोंल’ लामा हान्थिलिया, हाग्रानि जिउ जुनारफोरखौ गिनानै दंफांनि दन्दराव थानांलिया। बेफोर बादि गोदोनि आदबफोरा जोबस्रांनायनि उनाव दानिया बिगियाननि गोहोमाव नांनाय बादि खाबु खायदा स’फैबाय। अरनिफ्राय मोब्लिबनि सोरां जानायनि लोगो लोगो मानसिनि गोसोआवबो गोदान सोरां फैबाय । बेफोर गासिबो बिगियाननि बोर आरो बिगियाननि गोहोमनि थाखायनो जानो हाबाय।

बिगियाननि गोहोमावनो दिनै मानसिनि बेराम खारामाबो गोबां जोबलांबाय नांनाय बादि मुलि मालाम ओंखारबाय, थाब थैनांगौआबो सान्नैसो थांना थानो हाबाय। गोबां मानसिया ज’ जानानै दैखांनो हायै बिबानखौ मोब्लिब गोहोनि मोनसे बथाम सेरनायावनो दैखांनो हाबाय। जाय बेरामखौ अजानि जार फुक खालामनाया फाहामनो हाया बेखौबो डाक्टरनि मुलिया फाहामबाय। अजाहा भुत फेथानि सोमोन्दै बुंदोंब्लाबो बिगियाना बेखौ गावनि बिजिरनायजों फोरमान खालामनो हायिनि नाखस खालामदों। अजायाबो बिखौ दिन्थि हायाखै। बेनिखायनो मानसिहा बिगियाननि सायाव लासै लास फोथायनाय फैनो हमनायसै । बिगियाननि गोहोमा जेरावबो लासै साथिफबनो हमनायसै । सोनाबनि इउर ‘प बादि हादरमायाव बिगियाननि जागायजेन्नाया जादोंमोनब्लाबो दानिया बेनि दावगाखांनाया जेरावबो गोसारलांबाय । बिगियानगिरि निउटना बुहुमनि गेजेराव थानाय बोगथाबमानि सोमोन्दै आरो भारताव जगदीस चन्द्र बसुवा दंफां लाइफांनि मोदोमावबो जिउमा थानायनि सोमोन्दै बुंजेन्नायाव सिगां रावबो फोथायाखैमोन। नाथाय उनाव बेफोरखौ बिगियाना फोरमान खालामना दिन्थिना होनायसै । धोरोम आरो दर्शननिफ्रायनो गोबां बिगियानगिरि फोरमाना सोमजिदोंमोन। बेनिखायनो मानसिफोरनि गोसोआव बिगियाननि गोहोमा थाब थाब साग्लोबनो हानाय से। बिगियाननि बिहोमानि थाखायनो सुबुं हारिनि जिउ लामायाव सुखु गोजोन आरो आराम सोमजिदों ।
सुबुं समाजनि मेलेम गोनां सानथौगिरिफोरनि धोरोम आरो दर्शननि बिथिङाव सानहाबनो हानाय गुननि फिथाइ हिसाबै बिगियाननि जोनोमा जाजेन्दोंमोन । बुहुमनि बायदिसिना बिथिंनि सायाव सोनारनानै सानहाबनाय आरो नायबिजिरनायनि जाहोनाव दिहुन्नाय फिथाइयानो बिगियान जाखांनायनि गुदिमोन। बे दिहुनथाइफोरखौ आनजाद नायै नायै बाहायनानै सुबुं सिबिनाय आरो गाहामथि मावनायाव खाथायनाय जादोंमोन। हा बाहागोआव गोखै हान्थिनो हानाय रेल, मटर गारि, दैयाव दै जाहाज, अनाङाव अख्रां जाहाज, गुबुन ग्रह ग्रहसायाव दैथाय हरनो स्पुथनिक, अखांमायाव नायबिजिरनो बानायलु ग्रहसा बादि मानसिनि दिहुनथाइफोरा सुबुहारिनि गाहामथिनि थाखाय बाहाय जादों। हाल एवनो थाखाय ट्रेक्टर, आबादनि बिषगोनां मुलि बेराम फोजोबनो थाखाय बायदिसिना मुलि, सुथुरखौ होखारनो थाखाय बमा बारुद दिहुन्नाय बायदिसिनाफोरा मानसि जिउनि सायाव गोहोम खोलैदों। बेबादिनो गाहाम आरो गाज्रि फिथाइ होन्नाय मोननैबो रोखोमनि नांनाय मुलिया मानसि जिउनि सायाव गोहोम खोलैदों। बेफोर बिगियाननि बिहोमाया फारसेथिं मानसिनि थाखाय बोर सारम्रिदों आरो गुबुन फारसेथिं सावबादि जादों। मानोना मोनफा खामानियाव मोजां गाज्रि मोननैबो फिथाइ थानो हागौ। बेराम फाहामनाय भिटामिन बादि मुलियावबो मोननै फिथाइ थायो । एम्फौ सिथारनाय मुलियाव बिष थानायखायनो बेबादि मैगंखौ जायोब्ला उदै आरो देहानि बेराम सोमजिनो हागौ। एटम बमानि खामानिया जापानावल’ नङा, बेनि बेरनुनायनि थाखाय दुलाराय बुहुमावनो दासिम गाज्रि फिथाइ होगासिनो दं । एटमनि गोहोखौ बाहायनानै दावहायाव देरहानो थाखाय दाबो आमेरिका, चीन बायदि हादरफोरा बेनि गोहोनि आन्जाद नायबाय थानायनि जाहोनाव दुलाराय मुलुगानो सानसे जोबस्रांलांनो हागौ । कल कारखाना, गारि गुरानिफ्राय ओंखारनाय उखुन्दैया बाराद्राय कार्बन-डाइ- अक्साइड हगारनानै बार हावानि मैला खालामदों। बेनि जाहोनाव अखांमा सानि गोथां न’नि ग्रिन हाउसनि दाथायआ गाज्रि जानानै साननिफ्राय थोंजों फैनाय बिदुंआ बुहुमखौ थाथावै दुसार होनो खाबु लादों। कल-कारखाना, मिलफोरनिफ्राय ओंखारलांनाय गाज्रि दै आरो मैलाफोरा बुहुमनि हा बाहागो आरो दैफोरखौ गिज्रा खालानानै आबाद आरो ना बादि जिबिफोरनि थाखाय खहा खालामदों। बेफोरनिफ्राय ओंखारनाय उखुन्दै आरो गेसफोरा अक्सिजेननि खहा खालामनानै बारहावाखौ बिषगोनां सोमजिहोदों, अखा हानायफोराबो खमायलांदों। बेनि थाखायनो दंफां लाइफांफोरा थैलांदों, फिथाइ सामथाइया खमायलांदों, हाग्रानि जिबिफोरा बासा लानो आरो फिसाखांनो जायगा मोनैनि बिसोरनि अनजिमाया खमायलांदों। बेबादिनो मिथिंगा आरो जिब जिबिनि थासारिया समानथाइ लाखिनो हाया जालांदों।

आबहावानि गिज्राथिखौ मानसियानो मावदों। बिगियाननि दिहुनथाइनि गोहोमा बेनि थाखाय दायनिगिरि नङा। बेनिखायनो मोजां दिहुनथाइनि फारसे गोसो होनानै बेनि माबाफोर गोरोन्थि जादोंब्ला बेखौ बिगियानगिरिफोरानो सुस्रांनो नाजानांगोन । मोजाङाव एसेब्लाबो गाज्रि थाफानो हायो । बुहुमनि दुलाराय सुबुङानो आबहावानि गिज्राथिखौ दिनै मोनदांनो हाबाय, सांग्रांबो जाबाय। बिगियाननि गिलु बालु हानाय गाज्रि फिथाइनि फारसे नोजोर होबाय। इं 1965 मायथाइयाव आमेरिका, रुसिया आरो ब्रिटेइननि गेजेराव एटमनि हाथियार बाहायनायखौ होबथानो रादाय खाबाय। बुहुम हारिमा आफादआ आयेन दाना होबाय। मानसिया बिगियानारि गोहोखौ गाहाम थाखाय बाहायोब्ला बेयो साव जानानै थानो हानाय नङा। एटमनि अनगायै गुबुन गुबुन फिसा फिला गाज्रि फिथाइफोरखौबो बोखारस्रांनो थाखाय बिगियानगिरिफोरा नाजायोब्ला बुहुमनि थासारिया गाहाम जागोन। बिगियाना मुलुगनि सिगाङाव गोदान गोदानै नुजानाय जेंनाफोरखौ फोजोबनो अराय सम नाजालांनांगोन।