Essay Writing in Bodo Medium – रनसाइ लिरनाय (खेराइ)
Hello Students, We are going to provide the most important essay writing topics for Class 10 to Class 12 students in the Bodo language. This content has been prepared to help students understand essay writing easily and improve their writing skills. These essays are useful for school examinations, board exams, and practice purposes. By studying these important essays, students can develop clear thinking, proper language use, and confidence.
Essay Writing in Bodo Medium – रनसाइ लिरनाय (खेराइ)
खेराइ
खेराइया फोलेरारि बर ‘फोरनि मोनसे धोरोम फोरबो । बेखौ धोरोमारि रंजाथाइबो बुंजायो। बेयावबो गोबां मोसानाय मुसुरनाय आरो दामनाय देनाय थायो। बेयो फोलेरारि
बर ‘फोरनि देरसिन धोरोम फोरबो। खेराइ सोदोबा खोरिया बोराइ महरै सिबाइ महादेबा सिबिसुला जारा फाग्लानि सिगाडाव नुजानानै मोसानाय मुसुरनाय आरो दामनाय देनायजों गावनो फुजा बाउनो सुबुरन दिथा होनायनिफ्रायनो सोमजिदों होन्ना गोबां बर’ गोरों गोरा बोराइफोरा फोथायबोदों। बेनिखायनो खेराइया जाथोसे फुजा आरो मोसानाय मुसुरनायनिबो मोनसे रंजाथाइ । खेराइयाव बाथौब्राइ सिब महादेबखौ फुजिनाय जायो।
खेराइखौ धोरोम फोरबोब्लाबो आबाद मावनायजों सोमोन्दो थानायखाय आबादनिबोथोर हिसाबै गोबां बाहागोआव रान्नाय जायो। बेफोरनि गेजेराव आसु आरो मायसालि
खेराइयानो गुबै। आसु खेराइखौ उमराव खेराइबो बुंनाय जायो। बेखौ आसार दानाव आमथि सुवानि उनाव खुंनाय जायो। मायसालि खेराइखौ दोरसोन खेराइ मुंजोंबो
मोनथिजायो। बे खेराइखौ कार्तिक मासनि गिबि हाप्ताहयाव खुंनाय जायो। बे खेराइखौ मायनाव लोखिनि मुङै खुंनाय जायोखायनो बेखौ लोखि एबा लोखिनि खेराइबो बुंनाय जायो। फिथाइ सामथाइजों बाउनाय बे खेराइखौ सोरबाफोरा आमथि खेराइबो बुङो।
बिनि अनगायैबो गुबुन खेराइफोरा जादों ओरैबादि फालो खेराइ – बे खेराइखौ मागो दाननि अखाफोर गावदां एबा पुर्णिमा फोरबोनि दानस्रां दिनाव खुंनाय जायो। बेनिखायनो बेखौ दानस्रां खेराइबो बुंनाय जायो। बे खेराइखौनो बाथौ खेराइबो बुङो। बे खेराइयाव गुबैयै बाथौ ब्राइनि फुजा खालामनाय जायो ।
संसारारि खेराइ गोदान बोसोरखौ बरायनो आरो फैगौ बोसोराव बयनिबो गाहामथिनि थाखाय बे खेराइखौ खुंनाय जायो। बैसाग दाननि सेथि हाफथायाव मोनसे गोधार सानखालि बे खेराइखौ खुंनाय जायो। संसाराव मोजां संसार एबा राइजो जाहोनो थाखाय आफा अबंलावरि सिब्राइखौ बे खेराइयाव आर’ज गाबनाय जायो। बेनिखायनो बेयो संसारि खेराइ । बे मुंख ‘बोनाय खेराइफोरा राइजोनि खेराइ। बेफोरखौ राइजोनि धानसालियाव गुबैयै खुंनाय जायो। माब्लाबा राइजोनि फोथाराव जयै बाथौ गायसन्ना बे खेराइखौ खुंनाय जायो।
गोजौआव मुंख’नायफोरनि अनगायैबो न ‘खरनि खेराइ एबा न ‘नि खेराइ थायो। बे खेराइनि जेबो फोरबो गैया। न’खरनि मोजांनि थाखाय नांनाय जाब्लानो बे खेराइखौ न ‘खराव खुंनाय जायो। माब्लाबा राइजोयैबो बेबादि खेराइखौ राइजोनि माबाफोर नांनायाव हरखाब फोरबो गैयाब्लानो खुंनाय नुनो मोनो।
बेबादिनो आबादनि मोजांनि थाखाय, राइजोनि मोजांनि थाखाय आरो न ‘खरनि मोजांनि थाखाय खेराइ फोरबो फालिनाय जायो। मोनफ्रोमावबो न ‘नि मोदाइ बाथौब्राइ आरो बिनि बिसि मोदाइजो खामाख्या आइखौ सुबुनरन खालामनाय जायो।
मुंख ‘बोनाय खेराइफोरनि अनगायैबो राइजोयै ज’ जानै गारजा फुजा खालामनाय हुदा दं। बेखौनो खायसेया गारजा खेराइ एबा खेराइ गारजाबो बुङो । नाथाय बेहा नखरनि मोदाइजों सोमोन्दो गैया । सिब्राइ महादेबजों उन उन थाफानाय हाग्रानि मोदाइफोरखौ बाहेरा बाउनानै बाहेरा बाहेरा गोजानै थांहोनो थाखायसो बे गारजा फुजाखौ बाउनाय जायो। गारजा फुजायाव फुथलि हाबा खुंनाय जायो। बे मानसिनि हाबा जानाय बादियै मोसानाय मुसुरनाय, दामनाय देनायजों सोलियो। हौवा महरनि मोनसे फुथुलाखौ सल’आव थानाय रावना आरो हिन्जाव महरनि फुथुलिखौ रावनिनि नेरसोन हमना लानाय जायो। बिसोरनिनो हाबा बादियै लानानै रंजायो। बैसाग दाननि संसारि खेराइनि उनावनो एबा समान समान समाव आरो सोरबाबा जेथो दानाव बे गारजाखौ खुङो । हरसेमानि रंजा बाजा, जायै लोडै बेनि उनखालि थालिर बिफांनि बेहेलाव साजायना फज’ना फुथुला-फुथुलिखौ लोगोआव दाउसा, फारेव, दाउदै, बिबार माला होनानै दैमानि दैयाव फोजावहरो। बेनि नेरसोन ओंथिया जादों राइजो राजानि फैगौ बोसोराव जानो हानाय दुखु दाहा, बेराम खारामखौ हाग्रानि मोदाइफोरनो फुजिना बाउना गोजोन होनानै बिसोरजों लोगोसे सोनाबहाथिं फोजावफा हरनाय। खायफाया गारजाखौ खेराइनि बाहागोआव लाफाया ।
गोबां गामियाव खेराइ खुंनो मोदाइ थान एबा थाजिम खेराइसालि थायो । दंफां लाइफांजों गोगोम खेराइ सालिखौ गोथारै लाखिनाय जायो। सोरबाबा राइजोनि फोथारावबो जवै खेराइ फोरबो फालियो। गोहोनि खान्थि मथैब्ला खेराइयाव दाउ, अमा, बोरमा, दाउदै, जौ, माइरंफोर बाउथारनांगौ। फुजा बाउनायाव सासे अजा थायो। लोगोसे सासे दौरि आरो दौदिनिबो थायो। अजाया दौरिनि फुजा बाउनायाव दिथा होयो, मोदाइनो बाउनायाव मोन्थोर रायसङो। दौदिनिया खेराइनि मोदाइफोर आरो धोरोमसुला फुजियारिफोरनि गेजेरारि थान्दै। बिनि गेजेरजोंनो मोदाइ आरो फुजियारिफोरनि गेजेराव सोमोन्दो जाखाङो आरो बुजिज्लायनाय फैयो। दौदिनिया गुबै गुबै मोदाइफोरनि आखुफोरखौ गुबुन गुबुन महरनि मोसानायनि गेजेरजों फाव दिन्थिनानै बिसोरनि बायदि मैया खामानिफोरखौ राइजोनो बेखेवसारना होयो। बिजों राइजोआबो मोसाफायो।
खेराइ मोसानायखौ गाहायै मोननै बाहागोआव रान्नाय जायो। बेफोर जादों-
- गाहाइ खेराइ मोसानाय आरो
- आखान्थि खेराइ मोसानाय ।
बाथौ सिबियारिफोरनि खायसेबा सा 18 गाहाइ न ‘नि मोदाइ दं होन्ना फोथायो । बे मोदाइफोरनिनो साफ्रोमनिबो मुडै मोनफा खेराइ मोसानाय दं। जुदा जुदा खेराइ मोसानायजों बेफोर साफ्रोमनिबो आखु दिन्थिसारनानै बिसोरखौ गोजोन होनायनि लोगोसे बिसोरनि खाथियाव गंग्लायना आर’ज गाबनाय जायो । बेबादिनो खायफाया खेराइनि गाहाइ मोदाइखौ 18 नि जायगायाव 16 होन्नानै एखे रोखोमै फुजा बावो।
खेराइया आबादजों सोमोन्दो थानायनि अनगायैबो दानिया धोरोम दर्शननि मोनबा गोथौ तत्तज सोमोन्दो लाखिना सोलिदों। खेराइयाव बर ‘फोरनि गाहाइ मोदाइ बाथौब्राइ महादेबनि फुजा बाउनाय जायो । बे बाथौ ब्राइहा मोनबा गोथौ तत्त गुन दं । बियो नखरनि सिथ्लायाव एबा राइजोनि थानसालियाव सिरिबा दालाइजों गायनाय सिजौ एबा बाथौ बिफाङाव थायो होन्ना फोथायनाय जायो । फुजानि समाव बाथौ गुदियाव अजाया मोदाइ रायसंनाय बाथौ मोन्थोरनिफ्राय मोनबा गोथौ तत्तखौ गाहायाव होनाय बायदि बुजिनाय जायो –
सिजौनि सिरिया सिरिबा
बाथौनि बान्दोआ बान्दोबा,
बर’ बोराइनि राव आरो
आसाराबो फंबाइ।
बेबादिनो सिजौ बिफांनि सिरिबा दालाइ गोनां दानस’ना लानाय दालाइखौसो बाथौ बिथियाव गायनाय जायो। बेनो सिरिबा दालाइ दासाजों बिफां देरलाङो । बिनि सोरगिदिं बान्दोबा औवा खामि हेबनानै बाथौ दुमनाय जायो । बाथौ गुदियाव फुजा बाउनाय समाव “ओं हिं, प्रिं, फोत से” बे मोनबा रावजों मोन्थोर रायसंनाय जायो।
मोनबा आसारा जादों – गुरुसिबिनाय, धियान दान खालामनाय, गेदेरखौ सिबिनाय खुलुमनाय, उन्दैखौ अन्नाय- फालिनाय, खौसेयै मावनाय जानाय, माहारि हादरनि आंगो नागारसारनाय जिउ बाउनाय । बे फंबा आसाराव बर’ माहारिनि धोरोम हारिमुनि गाहाइ सान्थौखौ मोनदांनो हायो। बेफोरनि अनगायैबो बर’ माहारिनि गोबां बा तत्त एबा सान्धौ खेराइ खुंनायाव हाबनानै दं। बेयावनो बर ‘नि बा एबा मोनबानि गुमुरधियाबो दंदेरो। बर ‘नि सान्नाय खान्थिया जेरै से, नै, थाम, ब्रै, बा बे मोनबा गुबै । बेबादिनो बर ‘नि रोजाबनाय – दामनाय देंखोआबो भूपालि रागनि सा, रे, गा, पा, धा । बेनिखायनो बर ‘नि दामनाय सिफुंनि गुदुंआबो गुदुंबा । बर ‘फोरा फोथायनाय बादिबो खामानि मावग्रा ओंगोआ मोनबा, जैरै- आखाइ, आयें, हासुग्रा, खिग्रा, हां बोग्रा ओंगो, गियाननि ओंगोआबो मोनबा, जेरै- सालाय, बिगुर, गन्थं, खोमा, मेगन । खेराइनि फुजायाव नांनाय मोनबा लाइफां जैरै- थुलुंसि, जात्रासि, खासि हाग्रा, दुब्रि हाग्रा, बेल बिलाइ। गुदि आरो गिबि सोरजियाबो मोनबा, जेरै- हा, दै, बार, सान, अखां। बेनो देहा एबा सोलेर तत्तबो बुंजायो । बर ‘नि मानिनां गिबि गुरुआबो साबा, जैरै- बिमा गुरु, बिफा गुरु, गसाइ गुरु, मोदाइ गुरु, दिक्षा गुरु । बे बा तत्त एबा सान्थौनि गेजेरजों खेराइ सालियाव इसोरनि बायदि रंगिना संगिना महरखौ मोनदांनो हास्थायनाय नाजानायानो बर’ माहारिनि गुदि आरो गिबि गोथौ तत्त एबा धोरोम सान्थौ।
खेराइ फोरबोनि बाथौ फुजायाव गुबुन गुबुन जाय जगार नांगौ। बेफोरनि माखासेया बाधौ फुजानि गुदि महरनि नेरसोनफोरखौ रोखायै बेखेवसारना होयो। बेफोरनि गेजेराव फुजा बिथियाव साजायनो गोहोनि नेरसोन हिसाबै अन्थाइ रागाम थरसे, उजिनि नेरसोन हिसाबै बिजों खाथियाव दोनफानो दाउदै दैसे, जुलि नेरसोन हिसाबै दाउमा दाउसा जरासे, लोगोसे बाथौ बिथियाव जुलि मोदाइनि नेरसोन हिसाबै थुनो जुलि बिजुलि औवा आरो जरा जरा खुन्थिफोर, खोमसिखौ होम्रांना सोरां होनाय एबा गाज्रिखौ सावना सायहांगार खालामनायनि नेरसोन हिसाबै आलारि बाथियाव गोथार अर, जुलि बिजुलि औवायाव तानत्रिक सादोना दिन्थिनो थाखाय खाना होनो सि फिसा गोजा गुफुर जरासे, गोजा बिबार, फुजा बाउनो थाखाय गोथार गुफुर गोजा बिबार। मोनबा सिर गोनां सिजौ एबा बाथौ बिफांनि दालाइ मोनसे जथायनांगौ। बेनि मोनबा सिरा आनान गसाइनि मोनबा सोलेर तत्त दानायनि बिजि एबा गुदि मुवानि नेरसोन हिसाबै । हा, दै, बार, सान, अख्रां बुंजायो।
फुजायाव बाउनो थाखाय बेफोरनि अनगायैबो गुबुन गुबुन जाय जगारफोरा जादों गुबैयै दाउ, फारेव, अमा, बोरमा, जौ बिदै, गयफाथै, थालिर फिथाइ बायदिसिना । बेनि अनगायैबो आलारि बाथि, लाइजौ, अन, सनानि आखथाम, गुफुर आवा खुन्दु, धुप- धुना, सिन्दुर, धुलुंसि बिलाइ, खांख्ला बिफां, मोखना बिफां, बिजुलि औवा, कासनि जलथा, खुरै, खुन, रायगन, दाहाल थुग्रि, गामबारि खामफ्लाइ, बायदिसिना दामग्रा देग्राफोरनि मादाव खाम, सिकुं, सेरजा, जथा थानांगौ।
खेराइनि बाथौ बिधि (बिथा) खौ दानो हाजो एबा गोजौनि हा गोथार लाबोनांगौ। बाथौ दुमनायनि सोलिबोनाय खान्थि दं। जराबा एबा जरागु औवा खामिजों मोखांधिं गाहायै लामा लाखिना बेखौ सानजाब सिनजों दाउथु बिखा बादि जराथाम खामिजो जाबना हेबनांगौ। बाथौ बिथि दानो जायगाखौ सैस्रां सिबस्रां खालामजेन्नायनिफ्रायनो बिथि दानाया आबुं जानायसिम खाम, सिफुं, जथा, सेरजा दामगासिनो दामनांगौ। बेखौनो बाथौ जागायजेन्नाय बुंनाय जायो । फुजानि बिथिखौ साजायखांनायनि उनाव अजाया मोदाइ रायसंना गाहाइनि मोन्थोरखौ आवरायो-
आइ फै, आफा फै
जोंनि खर ‘नि जेंसिखौ बोखार फै।
सिजौनि सिरा सिरिबा
बानि बान्दोआ बान्दोबा
थाइगिर बिखडा खंबा
मोन सिं सिं बोराइनि
आसाराबो फंबा ।
आइया थैदों आइखौ गारदों
आफाया थैदों आफाखौ गारदों थेवबो बोराइ बाथौ महाराजाखौ
फुजिनो गाराखै जों।
खांख्ला थुदों सारि सारि
फुरगा अननि आलि
माखोना बिबारा
आइनि गनथंनि बालि।
माइनाव खामाइखा सुन्दरी
बोरलि बुरि आइया
बोर बानसा होग्रानि गिरि।
मिरु गिरिनि रागाम रागाम अन्थाइ
लैथोआ बोबोनाय लैथोआ बोबोनाय
मोनासोनि दै ज’ खालामबाय। हाजोनि हा गोथार लानानै
दैसा जिजिरिनि दै गोथार लानानै नोंसोरखौ फुजिगोन जों,
सेरें सेरें लाइजाम बनानै
गुफुर अनाव जोंथि
अर फोजोंना नै
हे आफा बाथौ बोराइ,
हे आइ आफाफोर,
आइलें, खाजि, आब्रा खुंगुर राजफुथुर, मोनासो, बोरलि बुरि राजखान्द्रा, संराजा, संरानि,
आलाइ खुंग्रि, बिलाइ खुंग्रि
बान्दारि, कुमारि, बासमुथि सौद्रि, आइफोर, आफाफोर
माइनाव मावथानसि
नोंसोरबो बोराइ बाथौ आफाजों फैफादों
बयबो ज’ जाफैदों
फुजा जाफै,
जोंनि खर ‘नि जेंसिखौ बोगारफै ।
जागायजेन्नायनि बे मोन्थोरनि गेजेरजों अजाया राइजोनि जानानै गाहाइ मोदाइ बाथौब्राइ शिब महादेब आरो बिनि लोगो लोब्बाफोरखौ फुजा जानायनि थाखाय गावबा गावनि मासि लानो आर’ज गाबो। मोन्थोरनि गेजेरजों बाथौ तत्तखौ बेखेवसारना होयो। फुजानि बिथि साजायनायनि नांनाय बेसाद आरो नेम खान्थिनि सोमोन्दैबो बुंफोरना होनाय जायो। गुबुन गुबुन मोन्थोरबो आवरायनानै अजाया मोदाइफोरनि मुं मख ‘नानै दौरिनि आखाइज फुजा बावो। अजानि मोन्थोर रायसंनायाव राइजोफोरा जफाना हेफाजाब होनानै आर ‘ज गाबो।
मोसानाय मुसुरनाय, दामनाय देनायनि गेजेरजों रंजा बाजा बाथौ ब्राइ आरो गुबुन नखरनि मोदाइफोरखौ गोजोन खुसि खालामनायनि उनाव फुजाखौ फोजोबो । बेनि उनाव माइनावनि मुडै बाउनाय माइरं आरो फुल फरसादनि दन खेरखाखौ दौरिनि नसिम खर’ आव रजुन्ना लाबोयो। बेनि उनावनो खेराइनि फुजाया थुंगेयो।
खेराइ फोरबोनि फुजा बाउनायनि नेम खान्थिया गोदोनि मथैब्ला गोजौआव मुंख’बोनाय बादिमोनब्लाबो नाथाय दानि गोदान खान्थिया गोबां सोलायबाय। दानि फुजाया जिब जिबि बुलि बाउवाब्लानो बेनि नेरसोन दिन्थिखौ जों फालिनानै निरामिस फुल प्रसाद बाउग्रा जाबाय। गोदोनि फोलेर खान्थिखौबो सुस्रांना गोरलै लानाय जाबाय। सुस्रांनायनि गेजेरजों गुबुन गुबुन जायगायाव बाथौ आश्रम गायसन्नानै गावबा गाव गोदान नेमखान्थिबो फोसावनो लादों।
खालामना बर ‘फोरनि खेराइयाव बाउनाय खान्थिया हिन्दु आसारज गोरोबो । नाथाय जिबजिबि बुलि बाउनायखौ दानिया गुबुन हारसा हिन्दुफोराबो सुस्रांना लानानै जिब हिंसाखौ गारबाय। बर ‘फोरनियाव सोलायनाय खान्थिया जिब हिंसागैयै जाबाय। दानि सोलोंथाइ आरो गियान गोनोखोनि मुगायाव बेखौ खोमसि फोथायथि सान्नानै नागारनाय जादों। सिगांनि फुजानि बाराद्राय सरसाखौबो मानसिया गिबाय । गोबां बर ‘फोरा बेफोरखौ मुगैनानै बानानै गुबुन गुबुन धोरोमाव बारस्लायबाय । बेनिखायनो मोसानाय मुसुरनाय, दामनाय देनाय आरो जिब हिंसागैयै खान्थिजों खेराइखौ लाखिफिन्नांगौ।
