Satish Chandra Basumatary-Essay Writing (सतीश चन्द्र बसुमतारी)

Today we are going to explain about the eminent writer Satish Chandra Basumatary (सतीश चन्द्र बसुमतारी), who holds a prominent place in Bodo literature.
He was a renowned writer, thinker, and social observer whose works deeply portray the cultural heritage, struggles, and aspirations of the Bodo society. His writings are known for their simplicity, realism, and strong social message, which have inspired generations of readers and contributed immensely to the development of Bodo literary tradition.

दिनै जों मुंदांखा लिरगिरि सतिश चन्द्र बसुमतारी (Satish Chandra Basumatary) नि सोमोन्दै रायज्लायनो थांगासिनो दं, जाय बड’ थुनलाइयाव मैखोम जायगा आवग्रियो। बिथाङा सासे मुंदांखा लिरगिरि, सानथौगिरि आरो समाज नोजोरगिरिमोन, जायनि लिरथाइयाव बर’ समाजनि हारिमुवारि उनमोनथाय, जुजिनाय आरो लुबैनायफोरखौ रोखायै बेरखांदों। बिथांनि लिरनाया गोरलै, मोगथाङारि आरो गोहोगोरा समाजारि खौरांफोरनि थाखाय बयजोंबो मिथिजायो, जाय फरायगिरिफोरनि गोबां जोलैफोरखौ थुलुंगा होदों आरो बड’ थुनलाइयारि दोरोङारिनि जौगानायाव गोबां बिहोमा होबोदों।

Satish Chandra Basumatary-Essay Writing (सतीश चन्द्र बसुमतारी)

सतीश चन्द्र बसुमतारी

बर ‘फोरनि गेजेराव जायफोर मानसिया गावनिखौ नागारसारनानै हारिनि गाहामथिनि थाखाय अराय जिउ खामानि मावलांदों बिसोरनि गेजेराव रुंसारि सतीश चन्द्र बसुमतारीयाबो सासे। गुबैयै थुनलाइगिरि हिसाबैसो मुंदांखाब्लाबो, बियो थार समाज सिबियारिमोन। बर’ समाजनि गेजेराव थानाय गाज्रि आखु आसारफोरखौ सुस्रांनानै राव आरो थुनलाइनि गेजेरजों बर’ हारिखौ मोजां लामा दिन्थिनानै दोनलांनो थाखाय बियो अराय सम हास्थायलांदों। सासे दोहोनि मौजादारनि फिसा जानानैबो राइजोनि लामा दिंग्रायलांनायखौ नुनानै बिनि गोसोआव अनखांनाय फैदोंमोन। बर’ हारिनिल’ नङा, दुलाराय भारतानो इंराजनि सिङाव थानानै गलामि बैनायखौ नुनानै बिनि गोसोआवबो लाजिनाय आरो दुखु फैदोंमोन। बेनिखायनो महात्मा गान्धीनि हांख्रायनायाव गुबुन भारतारिफोरनि बादियै कटन कलेजाव फरायफुनाय समावनो इं 1920 मायथाइयाव फरायनो गारनानै भारतनि उदांनि सोमावसारनायाव हेफाजाब होनायसै। आरोबाव बर’ हारिनि लोगोसे गुबुन गुबुन उनफिन्ना थानाय ट्राइबेल हारिफोर सिबिनायखौबो आखाइयाव लाफानायसै। बियो उन्दैनिफ्रायनो गोसो गोथौमोन आरो जेखौ हमो बेखौ गोसो गोथारै मावोमोन । बियो बर’फोरनि सिगां समनि समाज सिबियारि आरो थुनलाइ लिरगिरि । बियो बै समनि बेबादि हाबाफारिखौ सुफुंनो थाखाय नांनाय मावथिफारियाफोरनि गेजेराव सासे लामा दिन्थिगिरिमोन ।

इंराजी इं 1901 मायथाइयाव बै समनि सिंखावै ग’वालपारा जिल्लानि क ‘कराझार महकुमानि सिङाव थानाय भालुकमारि गामियाव सतीश चन्द्र बसुमतारीनि जोनोमा जादोंमोन। बिनि बिफानि मुङा थान्दाराम बसुमतारी आरो बिमानि मुङा खौलौ बसुमतारी। बे मोननै मौजानि मौजादारमोन । बियो बिफा थान्दारामा रिपु आरो सिरां भालुकमारिनिफ्राय खारबोनानै देबरगामिसिम फैयो आरो बेयावहायनो न’-बां लुनानै थाजिम थानो लानायसै। सतीश चन्द्र बसुमतारीया बे गामियावनो उन्दैनिफ्राय देरनो लाउनो लादोंमोन।

एसे देरनायाव सतीश चन्द्र बसुमतारीखौ सेरफांगुरि गुदि फरायसालियाव फरायनो थाखाय मुं थिसन्ना होनायसै । बियो बेनिफ्रायनो 1911 मायथाइयाव गुदि फरायसालिनि __जोबथा आनजादखौ बारग ‘नो हानायसै । बेनि उनाव बिखौ धुबुरी गोजौ फरायसालियाव मुं थिसन्ना हैनायसै। बै समाव सा ओनसोलाव गंनै गंथामसोल’ गुदि फरायसालि दंमोन। आरोबाव धुबुरीनि बाहेरा बे ओनसोलनि जेरावबो गुबुन गोजौ फरायसालि गैयामोन । कलेजफोरनि खोथाखौथ’ गामिनि मानसिया सान्नोनो हायामोन । बै समाव आसामाव गुवाहाटीयाव थानाय कटन कलेजल ‘मोन। बेनिखायनो मेट्रिक आनजादखौ उथ्रिखांनानै बियो 1919 मायथाइयाव बे कटन कलेजावनो फरायसा हिसाबै गावनि मुंखौ थिसनफैदोंमोन । आइ-ए थाखोआव बोसोरनै फरायनायनि उनाव टेष्ट आनजादाव उथ्रिनानै आइ एनि जोबथा आनजादखौ होनो थियारि जागासिनो दंमोन, नाथाय हायाखिसै। बेनिखायनो 1920 मायथाइयाव होनो गोनां बे आनजादाव जनो खाबु लानो हायाखिसै।

भारताव महात्मा गान्धी, चित्तरन्जन दास आरो गुबुनफोरनि दैदेन्नायाव जानाय भारतनि उदांस्रि सोमावसारनाया इं 1919 मायथाइयाव गोरा जाहैदोंमोन। आसामावबो बेनि गुथाला नांफैदोंमोन । फरायसा सतीश चन्द्र बसुमतारीया फरायनो गारनानै बे सोमावसारनायाव हेफाजाब होफैनायसै। बेबादिनो बियो राजखान्थियाव हेफजाब होनानै गावनि हाबाफारिखौ मावजेन्नो लायो। बियो इंराजफोरनो मदद होयै सोमावसारनायाव गान्धीजों हेफाजाब होनायसै । कचुगावनि हाग्रामा रिजार्भ ओनसोलाव थानाय नारसेबजानाय सुसिजानाय हारिसाफोरनि फारसे अनखांनानै बिसोरनि गाहामथिनि थाखाय जा एसे हागौ सिबिनाय खामानि मावनो लायो। गुबुनारि फालांगिरि इंराजफोरनि भारत शासनखौ बोखारस्रांनाय सोमावसारनायाव बियो गान्धीजीजों मदद होफानायसै।

सतीश चन्द्र बसुमतारीया इं 1923 मायथाइयाव हाजारि ब्रह्म मुंनि सिख्लाखौ हाबा खालामदोंमोन। बिसोरहा गासै साबा गथ’ गथाय जोनोम जादोंमोन । बिसोरनि गेजेराव हौवासा सानै आरो हिन्जावसाया साथाममोन। रां रुफानि जेबो आंखाल गैयैलाय बिसोरनि राइजो जानाया सुखु गोजोनैनो सोलिदोंमोन ।

सतीश चन्द्र बसुमतारीया उन्दैनिफ्रायनो गोसो गुरै आरो अनफावरिमोन । बियो सासे आखा फाखा समाज सिबियारि आरो समाज संदाथायगिरिमोन। बै समनि बर’ छात्र सन्मिलन होन्नाय संदाथाइजों बिहा मोजां सोमोन्दो दंमोन। बे संदाथाइखौ इं 1919 मायथाइयावनो गायसन्नाय जादमोन। ककराझार गुदि फरायसालियाव बेनि सेथि जथुम्माया जादोंमोन। बेयावनो सन्मिलननि थाखाय “बिबार ” मुंनि बर’ खुगा लाइसि दिहुन्नायनि थांखि लानाय जादोंमोन। जादब चन्द्र खाख्लारीया बे जथुम्माखौ आफादगिरिनि मासियाव जनानै दैदेनलांदोंमोन। सतीश बसुमतारीयाबो बे जथुम्मानि सासे मावथिमोन। सतीश चन्द्र बसुमतारीया 1946 मायथाइयाव आसाम ट्राइबेल लीगनि गाहाइ नेहाथारिमोन । समाज सिबिनायनि गेजेरजों बियो फिसा फिला साख्रिबो मावदोंमोन। बियो कमलसिं एम भि फरायसालियाव 1924-25 मायथाइनि गेजेराव बोसोरसेनि थाखाय फोरोंगिरि मावदोंमोन। बेनि बाहेरा मौजादारबो जादोंमोन। 1929 निफ्राय 1931 मायथाइसिम बिफानि मौजाखौ सालायदोंमोन। बेनि उनाव 1932 निफ्राय 1942 मायथाइसिम बियो गसाइगाव तहसिल मावखुलियाव महरिगिरि साखि मावदोंमोन। बेनि उनावबो 1942 निफ्राय 1945 मायथाइसिम सेरफांगुरि तहसिल मावखुलियाव महरिगिरि साखि मावदोंमोन ।

1947 मायथाइयाव सतीश चन्द्र बसुमतारीनि दैदेन्नायाव आसाम ट्राइबेल लीगआ दिल्लीयाव थांनानै भारतनि बै समनि राइजो दैदेनगिरि जवाहरलाल नेहुरुनि खाथियाव गांसे सुबुरन बिलाइ हैदोंमोन। बेनो ट्राइबेलफोरनि सिगांसिन सुबुरन बिलाइ । बेनि उनावबो 1949 मायथाइयाव सतीश बसुमतारीनि दैदेन्नायावनो दिल्लीयाव थांनानै ट्राइबेलफोरनि थाखाय एखुथायै लाखिनो हानाय सिदिउल ओनसोलनि दाबि खालामहैदोंमोन। बेनि थाखाय सुबुरन बिलाइ हैदोंमोन। उनाव आसाम प्लेइन्स ट्राइबेल लीगनि आफादगिरिबो मानिनां बसुमतारीयानो जानो हादोंमोन। सतीश बसुमतारीया 1951 आरो 1961 मायथाइयाव खेबनै आसाम बिधान आफादनि सोद्रोमा जानायनि थाखाय बिसायख’थियाव बाहागो लादोंमोन। नाथाय देरहायाखिसै।

बर’ हारि, समाज, हारिमु आरो बर’ थुनलाइनि थाखाय सतीश चन्द्र बसुमतारीया गोबां खामानि मावलांदोंमोन । बेफोर गासिबो देरहासारि खामानिमोन । बेनि थाखाय बर’ राइजोआ बिखौ अराय दिन गोसोखांबाय थानांगोन। बर ‘फोरनि धोरोम आरो हारिमु दावगाखांहोनो बियो जोबोद नाजादोंमोन। बेफोरनि गोबां सुस्रांनाय खामानिबो मावनो हादोंमोन। बर ‘फोरनि बाथौ धोरोम, खाम सिफुं सेरजा, मोसानाय मुसुरनाय, दानाय लुनाय न ‘खर शिल्पखौ बियो गोसो गोथारै मोजां मोनोमोन। बेफोरनि दावगानायनि थाखाय गावनि देहा मोदोम गोसो जिउ होनानै हास्थायदोंमोन । बिनि दैदेन्नायावनो 1955 मायथाइनि 26 जानुवारिखालि दिल्लीयाव खुंनाय सुबुं खान्थि सानाव बर’ मोसानाय मुसुरनाय, दामनाय देनायखौ दिन्थिपुंनाय जादोंमोन। बै दिन खालिनिफ्रायनो बर’ हारिनि कृष्टि हारिमुवा भारतारिफोरनि गोसोआव मोनसे गोथौ रेस दोन्नो हानायसै । अब्लानिफ्रायनो बर ‘नि मोसानाय आरो दामनाय देनायनि सावगारिया भारतनि हारिमुनि अख्राङाव हाथरखि बादि जोंना थाबाय। बर ‘नि बागुरुम्बा मोसानायखौ नुना सोमोनांनानै गोबां रादाब बिलाइफोरनि गेजेराव The Statesman आ लिरदोंमोन – “The Kachari dance of Assam is a Pleasant Surprise”. बर’ हारिखौ बियो अराय जिउ मोजां मोनलांनानै बर’ हारिनि मान इज्जत लाखिनो आरो बर’ हारिखौ बुहुमनि दरबाराव सिनायथि होनो नाजानायनि बेफोरनो मोनफा मोनफा सिनायथि। बर’ल’ नङा आसामनि दुलाराय ट्राइबेल हारिनि मान लाखिनो आरो रैखाथि होनायनि थाखायबो बियो नाजालांदों।

थुनलाइगिरि हिसाबै मानिनां सतीश चन्द्र बसुमतारीनि बिहोमाया गोबां दं । अनजिमायाव गोबां नङाब्लाबो बै समाव बर’ थुनलाइगिरिफोरनि जाखांफुनाय खामानियाव मानिनां बसुमतारीया जा एसे मावलांदों बेखौनो जों मुलाम्फा होनांगोन। बै समाव गोबां ट्राइबेल हारि एबा बर ‘फोराबो खाथिनि हारसा एबा बाङालिफोरनि गोहोमाव गोलैना गाव हारि आरो गाव हारिमुनि जानाय लानायफोरखौ मुगैना एरायलांदोंमोन । गोबाङा हारि, धोरोम आरो हारिमुखौ नागारलांदोंमोन। बै बादि समावनो कालीचरण ब्रह्म, मदाराम ब्रह्म, रुपनाथ ब्रह्म, सतीश चन्द्र बसुमतारी, प्रमद चन्द्र ब्रह्ममोन बादि गोसो गोथार सुबुंफोरा बर ‘फोरनि गेजेराव बेफोरबादि हारिनि अलखद समाव जोनोम लानानै गावबा गाव गोसोनि थुलुंगा लानानै जा जा मावलांदों बेफोरखौ बर’ हारिया जेब्लाबो बावनो हाखानाय नङा। सतीश चन्द्र बसुमतारीया बर’ रावनि सेथि लाइसि बिबारनि सुजुगिरि सायख’जादोंमोन। बेनो बर’ छात्र सन्मिलननि खुगा लाइसिमोन । बिबार लाइसिखौ 1920 मायथाइनिफ्रायनो दिहुन्नायनि थाखाय सान्नाय हनाय आरो जाय जगार खालामबाय थानाय जादोंमोन। सतीश बसुमतारीया बेनि फारसे गोसो होबोगासिनो दंमोन। नाथाय बे बिबारनि सेथि बिसानखौ 1924 मायथाइयावसो आबुं महर होनानै दिहुन्नाय जादोंमोन। बेनि उनाव 1926 मायथाइयाव दिहुन्नाय बर’ रावनि रादाब लाइसि जेनथ ‘खानि सुजुगिरियाबो सतीश बसुमतारीमोन। फरायसा समनिफ्रायनो बियो खन्थाइ आरो रायथाइ लिरबोदोंमोन। कमलसिं एमभि फरायसालियाव फोरोंगिरि साख्रि मावबाय थानाय समावनो बियो बर’ रावनि थुनफावथिना लिरनो लादोंमोन । बियो नायफिनजायै, बिखानि अर आरो रानि लाइमुथि मुनि गांथाम बर’ थुनफावथिना लिरना दिहुनदोंमोन।

मानिनां बसुमतारीया फरायसालियाव गावनि बिमानि रावनि गेजेरजों सोलोंथाइ होनायनि फारसे मददथाइ होदोंमोन आरो बेनि थाखाय राव फोसावदोंमोन । बियो उन्दैनिफ्रायनो बे खोथाखौ सानबोगासिनो दंमोन। बेनिखायनो गाव आसाम प्लेइन्स ट्राइबेल लीगनि गाहाइ सुजुगिरि जानाय समाव बिमानि रावजों फरायसाफोरनो सोलोंथाइ होनायनि फारसे सानखांफिनदोंमोन आरो आसामनि ट्राइबेल गथ ‘फोरखौ गावबा गाव बिमानि रावजों सोलोंथाइ होनायनि राहा खालामनो थाखाय आसाम आरो भारत सरकारनि खाथियाव दाबि खालामदोंमोन। बै समाव 1947 मायथाइयाव पण्डित जवहरलाल नेहुरुनो होनाय सुबुरन बिलाइनि 7 नं दफायाव बे बादि लिरनाय जादोंमोन ट्राइबेल हारिफोरनि सोलोंथाइखौ फरायसालिनि गुबैयै गुदि थाखोआव गावसोरनि बिमानि रावनि गेजेरजों होनायनि राहा खालामनायनि सोमोन्दै थिरां खालामना बुंनांगौ।

ट्राइबेलफोरनि गेजेराव बर’फोरा गावसोरनि थुनलाइ आफादखौ बर’ साहित्य सभा मुङे गायसनो 1952 मायथाइयाव। बै समाव मानिनां बसुमतारीया आसाम ट्राइबेल लीगनि गाहाइ नेहाथारि जानानै दंमोन। 1952 मायथाइनि 16 नबेम्बराव जोनोम मोन्नाय बे बर’ थुनलाइ आफादनि सेथि बोसोरसालिया जथुम्मानि थान्दै आफाद

आफादगिरि जादोंमोन सतीश बसुमतारीयानो। 1953 मायथाइयाव बै समनि आसामनि गिबि मन्थ्रि बिष्णु राम मेधिनि आखाइयाव बर’ गथ’ गथायफोरखौ बर’ रावजों फोरोंनायनि राहा खालामनो थाखाय सुबुरन बिलाइ होग्रा थान्दै हान्जायाव मानिनां बसुमतारीयाबो दंमोन। बर’ थुनलाइ आफादनि मोखां बिलाइ दि बड’नि सुजुमा आफादनि सिगां आफादगिरिया मानिनां बसुमतारीमोन । बियो 1967 मायथाइनिफ्राय 1968 मायथाइसिम बर’ थुनलाइ आफादनि आफादगिरि जानानै दंमोन। 1968 मायथाइयाव गवालपारा जिल्लानि दुधनै खारा मुनि जायगायाव जनाय बर’ थुनलाइ आफादनि बोसोर सालिया जथुम्मायाव मानिनां बसुमतारीया आफादगिरिनि मासियाव जदोंमोन।

मानिनां सतीश चन्द्र बसुमतारीया दा जोंनि गेजेराव गैलिया। बियो 1974 मायथाइनि 16 नबेम्बरखालि रुंसारि जालांबाय। बिनि आगोमा जिउ जोबनायनि लोगो लोगो दुलाराय ट्राइबेल आरो गुबैयै बर’ हारिया सासे थार सुबुं सिबियारिखौ खोमानो गोनां जाबाय। मानिनां बसुमतारी बादि गोथार गोसोनि अराय जिउ गावनिखौ नागारसारनानै गोलैसोना थानाय हारिखौ दैखांनो नाजालांनाय गेदेमा सुबुं बुहुमाव मोन्नाया गोब्राब। रंसारि डिम्बेसर नार्जारीनि रावै मानिनां सतीश चन्द्र बसुमतारीया बर’ हारिनि सासे मेंनो रोडै जोहोलावमोन। बिनि मावनाय खामानिफोर आरो बिनि जिउनि नेरसोन थांखिफोरखौ बर’ हारियाल’ नङा, आसामनि बयबो ट्राइबेल हारियानो बुहुम थागौमानि अराय दिन गोसोखांबाय थागोन। बिनि बानो रोङै मावनाय दांनाय खामानि दामानिफोरा बर’ आरो गुबुन ट्राइबेलफोरखौबो इयुननि थाखाय थुलुंगा होबाय थागोन।