हौवा-हिनजाव, एबा जो-जोलाखौ फोरमायनानै होयोब्ला बेखौनो आथोन होननानै बुङो। मुंमा सोदोबनि खायसेया जो ओंथि आरो खायसेया जोला ओंथि फोरमायो। जो ओंथि फोरमायनाय मुंमा सोदोबखौ जो आथोन आरो जोला ओंथि फोरमायनायखौ जोला आथोन बुङो। बर’ रावाव आथोनखौ गुवारै मोन्नै बाहागोआव बोखावनाय जायो। जैरै:-
क) जोला आथोन आरो
ख) जो आथोन
क) जोला आथोन :जायफोर मुंमा सोदोबफोरा हौवा एबा जोला ओंथि फोरमायो बेखौनो जोला आथोन बुङो।मानसि, जिउ-जुनार, आरो दाउमा- दाउसानि बेलायाव जोला आथोनखौ मोन्नो हायो। जेरै:-
मानसि – जाम्बा, हौवा, फिसाज्ला, हालुवा बायदि
जिउ-जुनार – दामब्रा, बुन्दा, फान्था, बलद बायदि
दाउमा दाउसा – दाउज्ला बायदि
ख) जो आथोनः जायफोर मुंमा सोदोबफोरा हिनजाव एबा जो ओंथि फोरमायो बेखौनो जो आथोन बुंनाय जायो।जोला आथोन बादिनो मानसि, जिउ- जुनार, दाउमा – दाउसानि बेलायाव जो आथोन मोन्नो हायो । जैरै:-
| मानसि | हिनजाव, फिसाजो, रुवाथि बायदि |
| जिउ-जुनार | गाइ, दामब्रि, बुन्दि, फान्थि बायदि |
| दाउमा दाउसा | दाउजो बायदि |
आथोन सोलायनाय खान्थि :
बर’ रावाव गासै मोनथाम खान्थिजों आथोन सोलायनाय जायो । बेफोर जाबायः
- गुबुन गुबुन सोदोब बाहायनानै ।
- मुंमानि सिगां एबा उनाव जो एबा जोला फोरमायग्रा गुबुन गुबुन सोदोब फजनानै आरो
- उन दाजाबदा दाजाबनानै।
(1) गुबुन गुबुन सोदोब बाहायनानैः बर’ रावाव जो ओंथि आरो जोला ओंथि फोरमायग्रा माखासे मुंमा सोदोबफोर दङ’ । बेफोर जो आरो जोला ओंथि फोरमायग्रा मुंमा सोदोबफोरखौ बाहायनानै जो आरो जोला आथोन फोरमायो। जेरैः
| जोला | जो |
|---|---|
| आदा | बाजै |
| बिदा | बिनानाव |
| राजा | रानि |
| हौवा | हिनजाव |
(2) मुंमानि सिगां एबा उनाव जो, जोला फोरमायग्रा सोदोब फज’फाना : बर’ रावाव मुंमानि सिगां एबा उनाव जो जोला फोरमायग्रा सोदोबफोर दाजाबफानानै आथोन सोलायनो हायो। बर’ रावाव मानसि, जिउ-जुनार, दाउमा-दाउसा फोरमायग्रा मुंमा सोदोबफोरजों जो जोला फोरमायग्रा माखासे सोदोबफोरखौ मुंमानि उन एबा सिगाङाव दाजाबफाना आथोन सोलायो । जैरैः-
| जोला | जो |
|---|---|
| मोसौ हालुवा | मोसौ गाइ |
| अमा बुन्दा | अमा बुन्दि |
| जोला | जो |
|---|---|
| हौवा मानसि | हिनजाव मानसि |
| फिसा हौवा | फिसा हिनजाव |
| जोला | जो |
|---|---|
| दाउ जोला | दाउ जो |
| हांसो जोला | हांसो जो |
(3) उन दाजाबदा फजनानै : बर’ रावाव उन दाजाबदा फजनानै मोनसे आथोननिफ्राय गुबुन मोनसे आथोनसिम सोलायनाय जायो । गोथे गुबै महरफोरा बे खान्थिनि आथोन सोलायनायाव गाहाइ बिफाव लायो। आथोन सोलायनायाव बाहायजानाय उन दाजाबदाफोरा जाबाय –
{-इ, -उ, -ए}
{-इ}: जोला आथोन फोरमायग्रा सोदोबनि जोबथा रिंसारा /आ / जायोब्ला {-इ} उन दाजाबदा दाजाबनानै जो आथोनसिम लांनो हायो। जेरै:-
| जोला | जो |
|---|---|
| बान्दा-इ | बान्दि |
| बुन्दा-इ | बुन्दि |
| बबा-इ | बबि |
{-उ}: जोला आथोन फोरमायग्रा सोदोबनि जोबथा रिंसारा /आ / जायोब्ला {-उ} उन दाजाबदा दाजाबनानै जो आथोनसिम लांनो हायो।जेरै:-
| जोला | जो |
|---|---|
| हाइथा-उ | हाइथु |
| गाइथा-उ | गाइथु |
{-ए}: बर’ रावनि|आ| रिंसारजों जोबहैनाय जोला फोरमायग्रा सोदोबजों {-ए} उन दाजाबदा दाजाबनानै जो आथोनसिम सोलायनाय जायो। जेरै:-
| जोला | जो |
|---|---|
| नाब्ला-ए | नाब्ले |
| हंला-ए | हंले |
गोजौवाव सावरायनाय आथोन सोलायनायनि मोनथाम गाहाइ राहाफोरनि अनगायैबो बर’ रावाव आथोन सोलायनो हायो एबा उलथा आथोन गैयि माखासे सोदोब मोनो। बेफोर बादि उलथा आथोन गैयि जोला आथोनखौ अराय जोला आथोन आरो जो आथोनखौ अराय जो
आथोन बुंनाय जायो। जैरैः
अराय जोला आथोन: दौरि, लावखार, हालमाजि बायदि।
अराय जो आथोन : सांग्रेमा, बखालि, दौदिनि बायदि।
